Палуан Нұрсұлтан Тұрсынов Азия чемпионы атанды

АСТАНА. 26 сәуір. Қазіргі күндері Астанада өтіп жатқан күрестен Азия чемпионатында 85 килоға дейінгі салмақта Нұрсұлтан Тұрсынов чемпион атанды. Бұл туралы egemen.kz тілшісі хабарлады. Грек-рим күресі бойынша құрлықтың ең мықтысы дәрежесіне жеткен жерлесіміз сөре ашар айқасын түркімен Кияс Эсеновпен өткізіп, жеңіске жетті. Ал жартылай финалда үндістандық Кумар Маноштан басым түсті. Финалдық айқасты Нұрсұлтан өзбек Рустам Аксакаловпен өткізді. Өз жанкүйерлерінің қызу қолдауына сүйенген біздің бағлан ақыры жеңіс тойын тойлады. Қазақстандықтарға «классиктер» күресінде тағы бір медальды 71 килодағы Мақсат Ережепов алып берді. Ол шешуші шайқаста Оңтүстік Корея палуаны Джун Джихьюннен ұтылып қалды. Қола медаль үшін таласқа қазақстандық Бағлан Жақанша қатысып, мақсатына жете алмады. Чемпионат 27 сәуір күні аяқталады. Дамир Қожамқұл. Дереккөз: egemen.kz. Фото: Vesti.kz.