Аймақтар • 04 Шілде, 2022

Жамбыл ақынның жәдігерлері

Атырауда Домбыра күніне орай облыстық тарихи-өлкетану музейінде «Ұлы жыраудың асыл мұрасы» атты көшпелі көрме өтті. Жамбыл атындағы әдеби-мемориалды музейі ұйымдастырған көрмеге ақынның тұтынған бұйымдары, оның ішінде екі домбырасы қойылды.

Жолдасбек КӨШЕРБАЙҰЛЫ

– Жамбыл ақынның шығармашылығының 75 жылдығына орай 92 жасында 12 бөлмелі үй берілген еді. Атамыз өмірден өткенге дейін сол үйде тұрды. Өмірден өткеніне екі жылдан соң сол үй Жамбыл музейіне айналды. Атырау жұртшылығының назарына ұсынылған көрмеге ақын атамыздың пайдаланған жеке бұйымдарын, домбырасы мен киген шапанын, отбасылық суреттерді, өзге де құнды жәдігерлерді әкелдік. Үш күн бойы атыраулық ағайынға Жамбыл ақынның өмірі мен шығармашылығынан мол мағлұмат ұсындық, – дейді ақынның немересі Салтанат Жамбылова.

Оның айтуынша, ақынның әдеби мемориалдық музейі Алматы облысының Жамбыл ауданындағы Жамбыл ауылында орналасқан. Ал Атыраудағы көрмеге қойылған көне жәдігердің бірі – Жамбыл ақынның жас кезінде ұстаған домбырасы. Ұлттық аспаптың шегі ешкінің ішегінен жасалған.

– Қазір ақынның ұрпақтары Алматы облысында тұрады. Немерелерінің бірі – мен Жамбыл атындағы әдеби-мемориалды музейінің директоры болсам, шөбересінің бірі осы музейде қор сақтаушысы болып жұмыс істейді. Біз үшін атамыздың ең құнды жәдігері – домбырасы мен шығармашылығы. Атамыз домбырасын қолынан тастамай, қазақтың ұлттық аспабы ретінде қадір тұтты, – дейді Салтанат Жамбылова.

Қазақстан Жазушылар одағы Атырау облыстық филиалының директоры Қойшығұл Жылқышиевтің пікірінше, Жамбыл ақын қазақтың ұлттық өнері – айтысты кейінгі ұрпаққа жеткізіп, кеңінен насихаттауға мол үлес қосты. Сол себептен ақынның шығармашылығы әлі де сан қырынан зерттелуі керек.

Атырау облысы

Күннің маңызды және өзекті жаңалықтарын «Егемен Қазақстан» телеграм каналынан оқыңыз