Мәселен, Еуропаға келгендерге індеттің салдарынан қабылдануы ықтимал карантиндік шектеулер демалыстарына, сапарына кедергі келтіруі мүмкін екені ескертілмек. Кейбір елдің денсаулық сақтау мекемелері адам көп жиналатын орындарда маска тағуды, сондай-ақ басқа да шектеу шараларын қайта енгізуге шақырды.
Атап айтқанда, туристер көп баратын елдерде – Грекияда, Испанияда, Францияда, Германияда вирус жұқтырғандар саны күн санап көбейіп келеді. Одан қала берді, Марокко, Тунис, Кариб теңізі аралдары секілді жиһанкездерді қызықтыратын өңірлерде де індет қайта күшіне мінді.
Грекияда 18 бен 24 жас аралығындағы тұрғындар арасында науқастанғандар өте көп. Денсаулық сақтау министрлігінің хабарлауынша, жаңа жағдайлар танымал туристік аймақтарда шоғырланған. Өткен аптада бір тәулікте 12 мыңға жуық инфекция жұқтырған адам тіркелді. Бұл алдыңғы аптамен салыстырғанда шамамен үш есеге көп.
Әсіресе Ион теңізіндегі Корфу, Цефалония және Закинтос аралдарында дертке шалдыққандар көбейген. Крит, Аттика аймағы, оның ішінде Грекия астанасы Афина, оңтүстік Эгей, Миконос және Парос секілді аралдар, сонымен қатар Родос пен Кос аралдары да қауіпті деңгейде қалып отыр.
Грекия мамыр айында коронавирусқа қарсы қабылданған шаралардан бас тартқан. Дегенмен, қоғамдық жабық орындарда, соның ішінде ауруханаларда, қоғамдық көліктерде және круиздік кемелерде бетперде кию әлі де міндетті.
Сарапшылар дертке шалдыққандар саны әлдеқайда көп болуы мүмкін екенін айтып отыр. Өйткені тұрғындар бұрынғыдай емес, тест тапсыруға құлықты емес. Сондықтан вирус жұқтырғандар оны білмей жүре беруі мүмкін.
Испанияда ауырғандар саны өткен аймен салыстырғанда 60 пайызға өскен. Бірақ жыл басындағы жағдайға әлі жете қойған жоқ. Майорка, Ибица, Менорка және Форментера аралдарында науқастар көбейген. Бұл маңда «Омикрон» штамының BA.5 нұсқасы кең таралған. Осыған байланысты дәрігерлер жағдай уыстан шығып кетуі мүмкін екенін айтып дабыл қағып жатыр.
Францияда екі аптадан астам уақыт ішінде науқастар саны 80 пайызға өскен. Бірақ шектеулерді қайта енгізу жоспарын халық қолдамайды. Таяуда ғана маска тағу міндеттемесі алынып тасталған-ды. Денсаулық сақтау министрі Брижит Бургиньон халықтың қоғамдық көлікте және басқа адамдар көп жиналатын жерлерде бетперде тағауды ұсынды.
Сондай-ақ Италияда, Португалияда да індет қайта өршіп келеді. Осыған байланысты аталған елдердің денсаулық сақтау саласы мамандары ертерек қамдану қажет екенін айтады.
