Маңызды мерек

Кеше Орталық коммуникациялар қызметінде 1 мамыр – Қазақстан халқының бірлігі күнінің Астана қаласында қалай мерекеленетіні туралы шаһардың ішкі саясат басқармасының бастығы Болат Тілепов, мәдениет басқармасының бастығы Болат Можағұлов айтып берді. Кездесуге, сондай-ақ украин этномәдени бірлестігінің төрайымы Тамара Шермет, корейлердің этномәдени бірлес­тігі төрағасының орынбасары Роза Пак және өзбек этномәдени орталығының төрағасы Шерзот Пулатов қатысты. Алдымен сөз алған Болат Тіле­пов барлық мерекелік іс-шаралар өте жоғары дең­гейде өтетін болады, деп бас­тады өзінің сөзін. Елба­сының Қазақстан халқы Ассам­блея­сының кезекті сессиясында көтерген бастамаларының аясында негізгі іс-шаралар бір жоспарға біріктірілді. Онда белгіленген шаралардың біразы қалада 14 сәуірден басталып та кетті. Жалпы, 2 мамырға дейін үлкенді-кішілі 40 іс-шара жоспарланған. Соның ішінде рухани-идеологиялық шаралар жұмыстар легі алдыңғы орында тұр. Осы бағытта барлық оқу орындарында бірлік пен ынтымақты насихаттайтын шаралар өтіп жатыр. Екінші орында әлеуметтік маңызы бар мәселелер қарастырылған. Мұның мақсаты – мемлекеттің көмегіне мұқтаж жандарға жәрдем көрсету. Қазақстан хал­қы­ның бірлігі негізінен саяси-идеологиялық пішімде өтетін мереке бол­ғандықтан, мемлекет тарапынан материалдық көмек көр­сетуге арнайы шешім бол­ма­ған, бірақ соған қарамай әрбір өңір жергілікті бюджеттің мүм­кін­шіліктеріне қарай түрлі қолдаулар көрсететін болады. Соның ішінде жалғызбасты 615 зейнеткерге бір реттік жәр­­дем көрсетіледі. Қалалық кәсіп­керлер палатасы жағдайы төмен отбасыларға арнайы дас­тарқан жайып, өз аттарынан азық-түлік пакетін таратады. Сонымен бірге, сауда-саттық орындарының осы күні бі­рінші кезектегі қажетті тамақ өнімдеріне жеңілдік қа­растыру ұйымдастырылады, дей ке­ліп Болат Тілепов мәдени-шы­ғармашылық шараларға тоқталды. Мерекенің ең бас­ты мәдени шарасы – «Қазақ елі» монументі алдындағы ауқымды, театрландырылған қойылым. Осын­дай мерекелік шара 2 мамыр күні қалалық алаңда да өтеді. Мәдени шаралардың ауқы­­мы жөнінде айту үшін сөз кезегін әріптесі, қалалық мәде­ниет басқармасының бас­тығы Болат Можағұловқа берді. Ол ең басты сахна – «Қазақ елі» монументінің қасында үш жерге концерттік бағдарлама қойылатынын жеткізді. Ең негізгі сахнада сағат 11.00-ден 14.00-ге дейін 700-ден астам әртістер мен әншілер өз өнерлерін көрсетеді. Ал кішілеу екі сахнада этномәдени орталықтар өкілдері  өнерлерін ұсынатын болады. Ондағы өнерпаздар саны 400-ден кем болмайды. Қазақстанның  және ТМД елдерінен келетін би ансамбльдері де өз өнерлерін ортаға салады, дей келіп бас­­­қарма бастығы олардың бір­қа­тарын атап өтті. Соның ішін­де Грузиядан, Түркиядан, Ресейден, Өзбекстаннан өнер ұжым­дары болатынын жеткізді. Б.Можағұлов одан әрі спорт­тық жарыстар үшін де подиумдар ұйымдастырылатынын айтты. 15 сауда нүктесі азық-түлік сатып, мерекелік алаңның әрін аша түсетін болады. Сондай-ақ, әртүрлі этностардың ас мәзірінің көрмесі де болад­­­­ы, деді ол. Бір қызығы, бұры­нғыдай этномәдени бір­лестік­тердің қолөнер көрме­сі емес, тұрмыстық салт-дәстүр­ле­рін көрсететін этноауылдар ұйымдастырылады екен. Со­нымен қатар, Б.Можағұлов қалалық әкімдіктің алдында болатын мерекелік шаралардың бағдарламасын да айтып өтті. Сөзінің соңында ол осынау мерекелік алаңдарға кем дегенде 100 мыңнан артық адам келеді деп жоспарланғанын жеткізді. Жақсыбай САМРАТ, «Егемен Қазақстан».