Онлайн-отырысқа Франция және Әзербайжан білім министрліктерінің, Чехия мен Қазақстанның, сондай-ақ Албанияның өкілдері қатысты.
Шығушы тең төрағалар өткен жартыжылдықта атқарылған жұмыс туралы есеп беріп, Болон процесіндегі тәжірибесімен бөлісті.
Жиын барысында қатысушылар 2022 жылдың екінші жартыжылдығына арналған BFUG 2021-2024 жұмыс жоспарының іс-шараларымен танысты. Қазақстан Орталық Азия елдері арасында Болон процесі қағидаттарын ілгерілетуге бағытталған іс-шаралар жоспарын ұсынды. Жоспар жаңа сын-қатерлер жағдайында жоғары білім беруді дамытудың жаңа үрдістерін енгізуді, жоғары оқу орындарының автономиясын кеңейтуді, инновациялық және цифрлық экожүйені қалыптастыруды, сондай-ақ Орталық Азия білім хабын қалыптастыруды көздейді.
«Қазақстан өңірдегі жоғары оқу орындарының ғылыми, зияткерлік және шығармашылық әлеуетін біріктіру үшін жоғары білімнің бірыңғай Орталық Азия кеңістігін құруға күш-жігерін жұмылдырады. Бұл жоғары оқу орындарының студенттері мен профессорлық-оқытушылық құрамына білім, тәжірибе алмасуға және бірлескен зерттеулерге қатысуға мүмкіндік береді», деді ҚР Ғылым және жоғары білім министрі Саясат Нұрбек.
Айта кетсек, 5 қазанда елордада BFUG кеңесінің отырысы өтеді. Аталған шарада Болон процесін дамытудың ағымдағы мәселелері талқыланып, қол жеткізілген прогресс бағаланады.
