Әңгіме еркін форматта өтті. Жастар қызықты жобалары туралы айтып, идеяларымен бөлісуге, сондай-ақ маңызды сұрақтарды көтеріп, оларға жауап алуға мүмкіндік алды.
Вице-премьер өз сөзінде ел халқының 20%-ын 14 пен 29 жас аралығындағы жастар құрайтынын атап өтті. Жас қазақстандықтардың жан-жақты дамуы – Үкімет үшін басым міндет. Мемлекет басшысының қолдауының арқасында елімізде жастарды қолдауға арналған бірқатар жоба жүзеге асырылуда.
«Президент Қасым-Жомарт Тоқаев жастардың қозғаушы күш екенін айтып, оның зор әлеуетін атап өтті. Біз бұл деңгейді жоғарылатуымыз керек. Мен сіздерді өз уақыттарыңыз бен әлеуеттеріңізді әділетті жаңа Қазақстанды құру жолына пайдалануға шақырамын. Туған елдің игілігі үшін қызмет етуге, адал еңбекке, прогрессивті білімге және озық тәжірибеге сүйенуге үндеймін. Біз бірге жаңа Қазақстан құрамыз!», деді Е.Тоғжанов.
Жастар көшбасшылары өз жобаларымен, идеяларымен Президенттің бастамасын қолдап, жаңа Қазақстанды құруға деген ниеттерін жеткізді.
Кездесуде есірткіге тәуелділіктің алдын алуға және есірткінің таралуына қарсы күреске бағытталған «NarkoSTOP», қазақ тілді халық үшін шет тілдерін дамытуға бағытталған «Тілдер саябағы» жобалары тыңдалды. Вице-премьер кездесу барысында ағылшын тілін оқытуға арналған арнайы орындар ұсынуды тапсырды. Сондай-ақ инклюзивті қоғамға да көңіл бөлінді.
Е.Тоғжанов инклюзивті қоғам ерекше қажеттіліктері бар және мүмкіндіктері шектеулі адамдар үшін тәуелсіз өмір салтын жүргізуге және әлеуметтік кәсіпкерлікті дамыту есебінен өмірдің барлық саласына, экономикалық тәуелсіздікке белсенді қатысуға жағдай жасалатын қоғам ретінде қарастырылуға тиіс екенін атап өтті.
«Инклюзивті қоғамды қалыптастыру, әсіресе жастар арасында жаппай инклюзивті сананы қалыптастыруға байланысты көптеген мәселені шешудің іргетасы болып табылады. Бұл үшін жұртшылықты және жастарды орын алған проблемаларды шешуге емес, алғышарттар мен себептер жасауға белсендірек тарту қажет. Саламатты өмір салты, білім алу, кәсіп пен дағдыларды игеруден бастап», деді Е.Тоғжанов.
Жас белсенділердің ұсыныстарын тыңдаған Ералы Тоғжанов қала жастарының әлеуеті туралы жылы лебізін білдіріп, қазіргі уақытта мемлекеттік жастар саясатында жаңа тәсілдерді қалыптастыру маңызды екенін және Алматы осы үдерісте тренд-мэйкер болуға тиіс екенін атап өтті.
Кездесу соңында Премьер-Министрдің орынбасары NARXOZ университетінің үздік магистранттарына дипломдарын салтанатты түрде тапсырды.
Сонымен қатар Е.Тоғжанов Алматы қаласына жасаған жұмыс сапары аясында «Шыңға Өрлеу» әлеуметтік клубының инфрақұрылымымен танысты.
«Шыңға өрлеу» – еліміздегі маңызды әлеуметтік жоба. Мұнда көп балалы, аз қамтылған отбасылардан шыққан мектеп жасындағы балалар қосымша тегін білім алады, спорттық және шығармашылық үйірмелерге қатысады. Мұндағы тәлімгерлер – зейнеткерлер мен мүмкіндігі шектеулі жандар. Бүгінгі таңда Алматы қаласында осындай 10 клуб жұмыс істейді, онда 180 адам еңбек етеді.
Е.Тоғжанов Үкіметпен балалар мен жастардың бос уақытын тиімді пайдалануды ұйымдастыру бойынша белсенді жұмыс жүргізіліп, жүйелі шаралар кешенінің іске асырылғанын атап өтті.
«Үкімет жыл соңына дейін балалардың 80%-ына жуығын қосымша спорт секцияларымен және үйірмелермен қамтуды жоспарлап отыр. Жалпы білім беретін мектептердің, балабақшалар мен колледждердің 28 мыңнан аса дене шынықтыру мұғалімі аптасына кемінде 3 қосымша спорт үйірмесін өткізеді. Бұл шаралар бұқаралық спортты дамытуға бағытталған. Спорттық инфрақұрылым аясы кеңеюде, 2021 жылы 41 ДСК іске қосылды, оның ішінде 32-сі аудан орталықтары мен ауылдарда. 2025 жылдың соңына дейін 131 спорт нысанын салу және қайта жаңарту жоспарланып отыр», деді вице-премьер.
Балалардың клубта болу уақытында барлық негізгі мектеп пәндері (математика, қазақ, орыс, ағылшын тілдері, IT-технология) бойынша үй тапсырмасын дайындауда кәсіби көмек көрсету ғана емес, сонымен қатар спорттық секциялар және шығармашылық үйірмелер – сауықтыру-дене шынықтыру, сәндік-қолданбалы өнер, шахмат, хореография, дене шынықтыру, музыка, домбыра, сахналық шеберлік және т.б. сабақтар қарастырылған.
Кездесу қорытындысы бойынша Е.Тоғжанов Алматы қаласының әкімдігіне балаларды одан әрі сүйемелдеу бойынша шаралар қабылдауды, түрлі шығармашылық жобалар мен спорттық конкурстарға, оның ішінде жұмыс істеп тұрған мемлекеттік білім беру, мәдениет және спорт ұйымдарының базасында қатысуына мүмкіндіктер жасауды тапсырды.
АЛМАТЫ
