Турнирдің шымылдығы Нижнекамскінің «Нефтехимигі» мен Магнитогорскінің «Металлургі» арасындағы кездесумен ашылады. Осы бәсеке аяқталған бетте «Барыс» Екатеринбургтің «Автомобилисімен» күш сынасады. Келесі күні «Автомобилист» Қытайдың «Куньлунь Ред Старымен», ал елордалық хоккейшілер «Нефтехимикпен» шеберлік байқасады. 18 тамызда «Автомобилист» пен «Нефтехимик» және «Куньлунь Ред Стар» мен «Металлург» арасындағы матчтарды тамашалаймыз. 19 тамызда Нижнекамск пен Бейжің және Магнитогорск пен Нұр-Сұлтанның командалары өзара сайысқа түседі. Жарыстың соңғы күні «Металлург» пен «Автомобилист» және «Барыс» пен «Куньлунь Ред Стар» кездеседі.
Естеріңізге сала кетейік, Президент кубогының жалауы осымен 12-мәрте желбірегелі отыр. Былтыр өткен бәсекеде «Барыстың» бағы жанса, екінші және үшінші орындарды Қарағандының «Сарыарқасы» мен Бейжіңнің «Куньлунь Ред Стар» клубтары иеленді.
