Мемлекет басшысының тапсырмасынан кейін Ақтау қаласының 36-шағын ауданында жоба құрылысы басталды. Құрылысты «ОРЦ Ақтау» ЖШС жеке инвестордың қаржысына салуда, қазіргі таңда 2 мың шаршы метр аумақта павильондар салынып жатыр. Павильондарда фермерлер өз өнімдерін делдалсыз және жалға алу төлемдерінсіз сата алады, бұл өз кезегінде тұтынушылар үшін бағаны қалыптастыруға оң әсер етпек.
– Көтерме-тарату орталығының құрылысы жоба бойынша кезең-кезеңімен іске асырылып жатыр. Қазір құрылыстың 30 пайызы аяқталды. Жобада жеміс-жидек, көкөніс және құрғақ тамақ өнімдерін сақтайтын қойма болады, сонымен қатар мультикамералы тоңазытқыштар қарастырылған. Жобаның мақсаты – мейрамханалар, азық-түлік дүкендері, басқа да бизнес субъектілерінде азық-түлік қауіпсіздігін қамтамасыз ету және қала тұрғындарын ешқандай делдалсыз, нарықтағы бағадан төмен азық-түлікпен қамту, дейді «ОРЦ Ақтау» ЖШС директоры Бекзат Жеткізгенов.
20 мың шаршы метр жерге орналасатын сауда және қойманы 500 адам жалға ала алады. 1,5 млрд теңге жұмсалатын жобада базар аумағында автомобильдерге және қалалық қоғамдық көліктерге арналған 750 орындық автобекет жұмыс істейтін болады, сондай-ақ бір мезетте 500 адам сыятын жолаушылар терминалы орналаспақ.
Көтерме-тарату орталығы 2023 жылы іске қосылады деп жоспарлануда.
Маңғыстау облысы
