Қазақстан құрамасы бесінші топта Словения және Черногория құрамаларымен ойнайды. Барлық топтың жеңімпаздары мен екінші орын алған төрт үздік команда элиталық кезеңге тікелей жолдама алса, екінші орын алған тағы сегіз команда өтпелі ойындарға қатысады.
Жерлестеріміз іріктеудің алғашқы ойынын 2022 жылғы 8 қазанда Словения құрамасымен өткізсе, төрт күннен кейін Черногорияға сапар шегеді. Араға бір ай салып, 9 қарашада Черногорияны өз алаңымызда қабылдаймыз. Ал топтағы соңғы матч 2023 жылдың 8 наурызына жоспарланған. Сол күні Кака баптайтын Қазақстан ұлттық құрамасы Словения футзалшыларымен шеберлік байқасады. Айта кетейік, 2021 жылы Литвада өткен әлем чемпионатында Қазақстан құрамасы тарихи нәтижеге қол жеткізіп, футзалдан әлем чемпионаттары тарихында тұңғыш рет жартылай финалға шыққан болатын.
