Денсаулық сақтау министрлігінің кешегі мәліметіне сүйенсек, 19 571 адам коронавирус инфекциясынан емделуде, олардың ішінде 1 472 пациент стационарда, 18 099 науқас амбулаториялық деңгейде ем қабылдауда. Індетке шалдыққандардың арасында 33 адамның жағдайы ауыр, 12 пациенттің жағдайы өте ауыр, 6 науқас ӨЖЖ аппаратында жатыр.
Еліміз бойынша екпе алушылардың да қатары күн сайын артуда. Нақтырақ айтсақ, бірінші компонент 10 777 692 адам вакцина салдырды, екінші компонент – 10 506 711 адам алған. Ревакциналанғандар саны – 4 977 049 адам. Ал Pfizer вакцинасының бірінші дозасын 1 231 796 адам салдырса, екінші дозасын 1 179 694 адам салдырды. Оның ішінде бірінші компонент вакцина салдырған жасөспірімдер – 869 781, жүкті әйелдер – 41 334, бала емізетін әйелдер – 145 108. Ал екінші компонент салдырған жасөспірімдер – 850 809, жүкті әйелдер – 39 024, бала емізетін әйелдер – 140 438 адам.
Денсаулық сақтау министрлігі Вакцинамен басқарылатын инфекцияларды бақылау басқармасының бас сарапшысы Айдана Ергасен коронавирусқа қарсы вакцина алу аурудан қорғанудың бірден-бір жолы екенін алға тартты.
«Адам ең алдымен екі дозамен толық вакциналаудан өтуі керек. Содан кейін 6 айдан кейін иммунитет төмендей бастайды. Оны зерттеулер көрсетіп отыр. Сондықтан 6 айдан соң 3-дозаны, тағы 6 айдан соң 4-дозаны алуды ұсынамыз. Оның адам ағзасына кері әсері жоқ. Қайта коронавирус инфекциясына қарсы ұжымдық иммунитетті сақтап тұрады. Жаңа штамдардың шығуына тосқауыл болады», деді маман.
Елордада «Омикрон» және «Стелс-Омикрон» коронавирус штамдарына байланысты эпидемиялық жағдай нашарлап, қаланың «сары аймаққа» өткенін жазған едік. Осыған байланысты Нұр-Сұлтан қаласының Бас мемлекеттік санитарлық дәрігері бірқатар шектеу шарасын қабылдады. Дәлірек айтсақ, науқаспен жақын байланыста болған адамдарды қашықтан жұмыс істеуге ауыстыру, COVID-19-ға қарсы вакциналауға абсолютті қарсы көрсетілімдері бар қызметкерлерді және жүкті әйелдерді қашықтан жұмыс істеуге ауыстыру, адам көп жиналатын орындарға (сауда ойын-сауық орталықтары, сауда үйлері, жабық базарлар, концерт залдары, театрлар, кинотеатрлар, стадиондар және басқа да спорт ғимараттары және т.б.) барған кезде, сондай-ақ 5 жасқа дейінгі балаларды қоспағанда және тамақтану кезінде, қалалық қоғамдық көлікте жол жүрген кезде маска тағу, 10-нан аса адамның қатысуымен өтетін жиындарды онлайн форматқа көшіру ұсынылды.
Сонымен қатар елордалық санитарлық-эпидемиялық бақылау департаменті барлық адамды еш себепсіз көп жиналатын орындарға бармауға, шектеу шараларын сақтауға шақырады.
