Экспозицияға автордың 60-тан астам кескіндеме және графикалық мәнердегі картиналары қойылған. Қырғыз даласының сұлулығын паш еткен пейзаждар, сюжеттік һәм жанрлық композициялар мен графикалық нобайлар көрме құндылығын арттыра түскен. Өнер жәрмеңкесінің тақырыбы бізді табиғат құбылысына мұқият зер салуға шақырады. Кенептегі жағындылар дүниедегі әр минут тау-тас, өзен-тоғай, гүл-өсімдік, құс-жәндікке қарап ойлануға, сол арқылы Жаратқанның шеберлігін жан-жүйеңмен тануға жұмсалуы тиіс дегенді меңзейтіндей. Өнер адамы көрерменін аспанның асқақтығына тамсандырып, жүрек көзін биікке бағыттайды.
Әлемге әйгілі Николас Рерих бұлттарды «Аспан сәулеті» деп атады. Ол: «Адамдар екіге бөлінеді. Кейбіреулер аспан сәулетімен қуануды біледі, ал басқалары үшін бұл жай ғана үнсіздік, дәлірек айтқанда, олардың жүректері үнсіз. Бір ғажабы, балалар бұлтқа қарап қуанып, қиялын қалай асқақтату керегін біледі. Біздің қиялымыз тек бақылаудың салдары. Айналаны тануға ұмтылған алғашқы күндерден бастап әрбір адам сөзбен жеткізе алмайтын көктегі кітаптың кілтін табуға талпынуы керек», деп жазады. Рерих өз еңбектерінде мәдениет пен өнердің адамзат болашағы үшін алатын орны мен маңызын үнемі атап өткен. Сабиджан Бабаджанов үшін де өнер өмірді танудың өзегі екенін қолтаңбасына қарап аңғару қиын емес.
«Суретші әртүрлі техника мен әдісті жетік меңгерген. Бұл акварель парақтары, сия мен қаламмен жасалған жұмыстар, кенепке, картон мен қағаздағы майлы бояу, аралас техника. Жұмыста жарық, жылу, ауа көп. Кейбір шығармалар ашық түстермен және темпераменттік жазуымен ерекшеленеді, өзгелер үшін ұстамды және монохромды. Бірақ тұтастай алғанда суретшінің өмірлік ісіне, сұлулығына, өнеріне деген шынайылығы мен сүйіспеншілігін сезінуге болады. Қазақ көрермені кезекті рет талантты өнер иесі Сәбиджан Камалұлының сан қырлы шығармашылығымен танысуға мүмкіндік алды. 2012 жылы Ә.Қастеев атындағы өнер музейі суретшінің «Кетіп бара жатқан керуеннің ізімен» атты жеке көрмесін, 2014 жылы Шыңғыс Айтматовтың шығармашылығына арналған «Ол аспан да, жер де, таулар да еді» атты бейнелер мен символикаға толы көрмесін сәтті өткізген болатын», дейді көрме жетекшісі өнертанушы Наталья Баженова.
Мәңгілік тақырыбы суретшінің бүкіл жұмысында қызыл сызық арқылы өтеді. Суреттер ғарыш рухына толы. Талғампаз көрермен ақшағыл бұлттардан, өзен бұрылыстарынан, жақпар таулардың керім-келбетінен уақыт үнін тыңдайды. Кенептегі кемеңгер уақыт бізді армандардың, аңыздар мен мифтердің әлеміне жетелейді.
Сабиджан Бабажанов Қырғызстанның Еңбек сіңірген мәдениет қайраткері. График. Дизайнер. 1941 жылы Қытайдың Құлжа қаласында дүниеге келген. 1955 жылы отбасы Қырғызстанға көшіп келді. 1963 жылы Фрунзе көркемсурет училищесін бітірген. 1970 жылдан бастап Мәскеуде бес жыл дизайнер мамандығы бойынша оқыды. Сәбиджан Камалұлы көптеген республикалық, бүкілодақтық, халықаралық көрменің қатысушысы. 1986 жылдан КСРО Суретшілер одағының мүшесі. 1998 жылдан бері Калифорния ғылым, өнеркәсіп, білім және өнер халықаралық академиясының құрметті мүшесі. Суретшінің туындылары Қырғызстан, Қазақстан, Ресей, Франция, Италия, Германия, Канада, Түркия, Иран, Жапония және әлемнің басқа елдерінің көптеген мұражайы мен жеке коллекцияларында сақтаулы.
АЛМАТЫ
