Дәстүрлі түрде ұйымдастырылып келе жатқан байқаудың жоғары деңгейде өтуіне Жамбыл облысы әкімдігі айтарлықтай үлес қосты. Өз кезегінде қатысушылар жақсы дайындықпен келгендерін байқатты. Олар бұрынырақта Facebook әлеуметтік желісіндегі tilqazyna парақшасы арқылы өздерінің бейнесабақтарын жариялаған болатын. Сайыстың алғашқы кезеңінде әр үміткер қазақ тілін оқытудағы өзінің жинақтаған тәжірибесі негізінде авторлық бағдарламасын ұсынса, қазылар алқасы олардың жұмысын өз деңгейінде бағалап отырды.
Бірнеше кезеңді қамтыған байқаудың шешуші кезеңінде үміткерлер тіл үйренушілерге сөйлеу әрекетінің төрт түрі бойынша (оқылым, жазылым, тыңдалым, айтылым) тапсырмалар беріп, аудиториямен жұмыс жасау қабілетін байқап көрді. Тапсырманы орындауға топ мүшелерін белсенді қатыстыру жағы қатаң ескерілді.
Жоғары деңгейде өткен байқау қорытындысында жеңімпаз бен жүлдегерлерді қазылар алқасының мүшелері, есімі елімізге кеңінен танымал ғалымдар марапаттады.
Нәтижесінде, павлодарлық Тәттігүл Бекенова, ақмолалық Ғайнел Дүйсенбаева, қостанайлық Айнұр Миркемелова үшінші орынға лайық деп танылса, қарағандылық Фариза Боранғазы мен ақтөбелік Шыңғысхан Түменбаевқа екінші орын бұйырды. Байқау қорытындысында жамбылдық Гүлдерайым Болатқызы бірінші орын иеленсе, қызылордалық Алтынай Орынбаева бас жүлдегер атанды.
Тараз
