Павлодар қаласының Катаев атындағы оқушылар сарайының алаңында ұйымдастырылған мектеп жәрмеңкесіне 15 кәсіпкер атсалысып, келушілерге мектепке қажет құрал-жабдықтар мен киім-кешектердің мол түрін ұсынды.
«Жәрмеңкеде тауарларын сатуға әкелген кәсіп иелерінің басым бөлігі өз ниеттерімен келіп отыр. Біз мұнда сатылатын әр тауар базардағыдан арзан әрі әр сатып алушыға белгілі көлемде жеңілдік болуға тиіс екенін алдын ала хабарлағанбыз. Келіскендей, жәрмеңкедегі баға сатып алушылар көңілінен шығуда», деп атап өтті өңірлік білім беру басқармасының бас маманы Жанара Сматаева.
Виктория есімді сатушы келушілердің дені дәптер, күнделіктер мен қаламсапты көп сатып алып жатқанын жеткізді. Білім күні жақындағанда ата-аналар арнайы құралдарды, атап айтқанда, транспортер, циркуль, сызғыш сияқты заттарға сұранысты жиілете түседі екен. «Байқағанымыздай, дәптерді көп сатып алып жатыр. Бір алғанда сырты жұмсақ 20-30 дәптер және кемі 10-15 дана қатты мұқабалы қалың дәптер алады. Биыл кеңсе тауарларының бағасы былтырғымен салыстырғанда екі есеге жуық өсті. Бізге көтерме бағада жеткізуші фирмалар алдағы уақытта мектеп құралдарының құны тағы да өсуі мүмкін екенін айтты», дейді кәсіпкер.
Жұқа 12 беттік дәптер бүгінде жергілікті сауда үйлері мен базарларда шамамен 45 теңге, қалам 100-200 теңге тұрса, жәрмеңкеде сәл арзанырақ бағада сатылды. Ал сөрелерде тұрған оқушы киімі мен спорттық киімдердің көбі сапа тұрғысынан көзге түсе қоймады. Кәсіпкерлер бағасы арзан болғаны үшін арзанқол материалдан тігілген киім-кешектерді әкелгенге ұқсайды. Соған орай, мектепке қажет киім-кешек сатып алғандар қарасы көп болмады.
Анар Бейсен есімді ана биыл 3 баласын мектепке дайындап жатыр. Айтуынша, базардағы баға шарықтап тұр. Амалсыздан, қаладағы кеңсе заттарын сататын дүкендерді жағалап, ең арзан деген құрал-жабдықтарды таңдап жүр. Жәрмеңкеде келушілерге ұсынылған кейбір тауарлар базардың нарқымен бірдей. Алдағы уақытта мұндай жәрмеңкелер ұйымдастырылғанда білім басқармасы бағаны әлі де төмендетуге ықпал етсе деген тілегін жеткізді көпбалалы ана.
Жәрмеңке барысында алаңда логопед, психолог және педиатр мамандар жұмыс істеп, ата-аналарға тегін ақыл-кеңестер берді.
Биыл дәстүрлі акция «Мектепке жол – шекарасыз жақсылық» ұранымен өтуде. Мақсат – аз қамтылған, көпбалалы отбасылардан шыққан және жетім балаларға, сонымен қатар ата-анасының қамқорлығынсыз қалған оқушыларға оқу жылының басталуына орай материалдық қолдау көрсету. Өңірлік білім беру басқармасының мәліметінше, оқушыларға аталған акция шеңберінде мектепке дайындалуға көмек ретінде жаппай оқыту қорынан 1,4 млрд теңге қаражат бөлу қарастырылған. Ал жылдың алғашқы жартысында 13 мыңнан астам балаға 458,2 млн теңге көлемінде көмек көрсетілді. Бұл қаражат білім ордаларында балаларды ыстық тамақ, киім-кешек, мектеп құралдарымен қамтуға, курорттық ұйымдарға және демалыс лагерьлеріне жолдама алуға жұмсалған.
Қазір қайырымдылық іс-шарасына жергілікті демеушілерді, әлеуметтік серіктестерді, мемлекеттік ұйымдарды тарту бойынша жұмыстар жүргізілуде. Биыл ауылдар үшін кәсіпкерлермен бірлесіп шалғайдағы елді мекендерге көшпелі мектеп автодүкендерін ұйымдастыру қолға алынды. Мәселен, «Сағымбай» шаруа қожалығы Ертіс ауданындағы Бірлік негізгі мектебінің 6 оқушысына кеңсе тауарлары салынған сөмкелер сатып алған. Ертіс ауылының тұрғыны Ж.Мағауова 100 мың теңге сомасына балаларға арналған мектеп формасының 8 жиынтығын табыс етті. «Incom company» ЖШС директоры С.Починок аз қамтылған отбасылардан шыққан 50 балаға 115 мың теңге сомасында мектеп және спорт сөмкелерін алып берген.
Облыс орталығындағы №7 орта мектеп директорының тәрбие ісі жөніндегі орынбасары Меңтай Мұхтарованың айтуынша, білім ордасына «Мектепке жол» акциясы үшін 1,5 млн теңге қаражат бөлінген.
– 58 оқушыны мектепке дайындау жоспарланып отыр. Оларға кеңсе құралдары толығымен таратылды. Алдағы уақытта жылы күртелер, аяқкиімдер сатып алынбақ. Қазіргі таңда демеушілерге де хат жолданды. Жауап күтудеміз, – дейді ұстаз.
Осы уақытқа дейін жаңа оқу жылына әзірлік бойынша өңірдегі 300 балаға көмек көрсетілген.
Мұрат ҚАПАНҰЛЫ,
«Egemen Qazaqstan»
Павлодар облысы
