Қоғам • 16 Тамыз, 2022

Жалбыз бен жауынқұрт өсіреді

229 рет көрсетілді

Ерінбеген адамға кәсіп көп. Мәселен, атыраулық Анар Бекмамбетова өзгелерге тосын көрінгенімен, үлгі боларлық істі қолға алды. Қазір жеке үйінің ауласында Марокко жалбызы мен калифорниялық жауынқұртты өсіріп отыр.

Оның айтуынша, жауынқұрт – топырақты құнарландыруға таптырмайтын тәсіл. Ол бұл кәсібін жыл басында бастаған. Жауынқұртты жа­пы­рақ, тал сабағы мен төрт түліктен бөлінген органикалық заттармен қо­рек­тендіреді. Сөйтіп, биогумус деп ата­латын биологиялық тыңайтқыш шығарады.

– Бұл кәсіпті қолға аламын деген ойым болған жоқ еді. Жаңа жыл қарсаңында күйеубала бір қорап­қа салынған калифорниялық жауын­құртты әкеліп берді. Содан жауын­құрт­ты зерттей бастадым. Кейін үйде өсіруге бел байладым. Жауынқұрт көбейе түсті. Кейін тағы да сатып алдым. Алты айда бір қораптағы жауын­құртты 400 мыңға жеткіздім. Қазір 40 шаршы метр аумақта өсіріп отырмын, – дейді А.Бекмамбетова.

Үй іргесінен жеке кәсібін ашқан ол құрт­тарға малдың тезегі мен жеміс-жидек, көкөністің қалдығын да береді. Мұндай органикалық тыңайт­қыштарды ауыл ішінен табу қиын емес. Алайда жауынқұрттың кали­форниялық түрі жоғары бағала­натын­дық­тан, оның күтімі де соған сай болуы қажет.

– Қазір калифорниялық жауын­құр­тының нарықтағы құны 1 шаршы метріне 150 мың теңге тұрады. Құрт­тар­ды дернәсіл кезінде малдың қиы мен жеміс-жидек қалдығына тастаймын. Қалдықты үш айда қорытып бере­ді. Одан соң құрттарды елекпен өткізіп, сатуға әзірлеп қоямын. Сатудан қал­ғанын қайтадан қалдықтарды қоры­туға жіберемін. Бұл процесс осылай тоқтаусыз жалғаса береді, – деп тәжірибесімен бөлісті А.Бекмамбетова.

Ол үйінің ауласында тек жауынқұрт өсірумен шектелген жоқ. Бұған қоса жеміс-жидек пен көкөністің сан түрін өсіріп отыр. Соның қатарында Марокко жалбызы да бар.

– Бұрын жалбызды өсіріп көрген емеспін. Марокко жалбызын әріптесім­нің кеңесімен өсіруге ден қойдым. Ол Марокко жалбызын біздің нарықтан табу қиын екенін, бағасы қымбат екенін әңгімеледі. Расында да, солай екен. Сауда орнынан бір кило жалбызды сатып әкелдім. Оны әбден тамыр жайғанша, екі апта бойы баптадым. Кейін аулаға ектім. Қазір жалбызға сұраныс көбейіп, өсіріп үлгере алмай жүрмін, – дейді ол.

Енді Анар Бекмамбетова жауын­құр­ты мен жалбыз өсіру ісін кеңейтпек ойы бар. Өйткені оған шаруалардан сұраныс арта түскен. Сол себептен қолынан келетін кәсіпті жандандырып, биогумуспен жергілікті егіншілерді қам­тамасыз етуді көздеп отыр.

– Құрт пен жалбыз өсірудің пайдасы да, табысы да мол екеніне көз жеткіздім. Алдымен еңбек етуге ынтам оянды. Екіншіден, өңірдің тұзды топырағын құнарландыруға ықпалы зор. Үшіншіден, осы кезге дейін сырттан тасымалданған қажетті нәрсені өзі­міз де өсіре алады екенбіз. Демек төл ақшамыз сыртқа кетпей, өзімізде қалады ғой, – дейді бағбан.

 

Атырау облысы

Соңғы жаңалықтар

Ұқсас жаңалықтар