Аталған конференция Балалар жылына орай дайындалған бейнеролик көрсетілімімен шымылдық түрді. Жетісу облысының әкімі Бейбіт Исабаев алғашқы болып сөз алып, тамыз конференциясы білім берудегі бағытымызды айқындап, ортақ мәселелерді талқылайтын ашық алаң екенін атап өтті.
«Білім беру саласында жаңа заман талабына сай енгізіліп жатқан өзгерістер мен жүргізіліп жатқан реформалардың басты тірегі – сіздер. Сондықтан бұл істе үлкен жауапкершілік те, лайық мәртебе де сіздердің үлестеріңізде. Бір қуантарлығы, біздің Жетісу облысында апатты және үш ауысымды мектептер жоқ. Сондықтан ендігі біздің басты назарымыз – білім сапасын көтеру мен тәрбие тізгінін мықтап ұстауға бағытталуға тиіс», дей келе қазіргі таңда облыста 3 жастан 6 жасқа дейінгі балаларды мектепке дейінгі біліммен қамту көрсеткіші 98,3 пайызды құрап отырғанын жеткізді. Биыл Жетісу облысында 1 сыныпқа баратын балғындардың 76 пайызы қазақ мектептерін таңдаған.
«Адам – мемлекеттің басты байлығы болса, балаларды оқыту мен тәрбиелеу – біздің ең негізгі міндетіміз. Өкінішке қарай, биыл 7 айда облыстағы кәмелетке толмағандардың қатысуымен 52 қылмыс жасалған. Бұл көрсеткіш өткен жылмен салыстырғанда 2,4 есеге өсіп отыр. Суицид мәселесі де күн тәртібінен түскен жоқ», деп өзекті мәселені де айтқан облыс басшысы мұны шешу мақсатында биылдан бастап тәрбие үдерісінде мектеп пен ата-аналардың өзара жауапкершілігіне негізделген «оқушы – мектеп – ата-ана» бірлескен жұмыс форматы енгізілетінін тілге тиек етті. Сонымен қатар аймақ бойынша жаңа оқу жылы қарсаңында атқарылған істерді де мәлімдеді.
Облыс бойынша 95 мектепке турникет, барлық білім ошағына «дабыл түймелері» орнатылған. Ал 57 мектептің бейнебақылау камералары интернет желісі арқылы Жедел бақылау орталығына қосылған.
«Жастарға техникалық және кәсіптік білім беру, оларды жұмыспен қамту мәселесі күн тәртібінен түскен жоқ», деді өңір басшысы. Облыстағы кәсіптік білім беретін мекемелерде 50 мамандық, 93 біліктілік бойынша мамандар даярланады. Әрбір кадрды нарық сұранысына сай әзірлеу керек. Қазіргі уақытта қажетті мамандықтар үшін облыстық бюджеттен 192,1 млн теңге бөлініп отыр.
Өз кезегінде баяндама жасаған облыстық білім басқармасының басшысы Айжан Адамбекова:
«Бүгінгі тамыз кеңесінің «Білімді ұлт: терең білім, еңбекқорлық және отаншылдық қасиет» тақырыбы аса маңызды құндылықтарды міндеттейді. Облыста 405 мектепке дейінгі білім беру ұйымдарында 3 328 педагог 36 524 балаға тәрбие беруде. Балабақша тәрбиешілерінің біліктілік арттыру курстарының мазмұны қайта жаңарды. Жалпы, 3 328 тәрбиешінің 26 пайызы ғана жаңа жүйе бойынша аттестатталған. Демек мектепке дейінгі білім беру ұйымдары басшыларының алдында педагог әлеуетін арттыру бойынша жүйелі түрде жұмысты атқару – басты бағыт», дей келе, жаңа оқу жылында орта білім беру жүйесіне біршама өзгеріс енгізілгенін айтты.
Биыл жастардың техникалық және кәсіптік оқумен қамтылу көрсеткішін арттырып, нарыққа қажетті жұмысшы мамандықтарды дайындауға ерекше назар аударылады. Сол сияқты мектепке дейінгі ұйымдар желісін ұлғайту мақсатында мемлекет-жекеменшік серіктестік тетігі жандандырылып, инвестиция тарту жұмыстары жүйелі жүргізілуге тиіс. Басталғалы отырған оқу жылындағы бағыт-бағдар негізінен осындай міндеттерге негізделеді.
«Біз педагогтердің әлеуетін қолдана отырып, әр мұғалімнің кәсіби өсуіне жағдай жасаймыз. Сонымен қатар жас мамандарды және тәжірибесі жоқ мамандарды қабылдауда да өзгеріс бар, яғни педагог категориясын алу үшін міндетті түрде ұлттық квалификациялық тест өткізуі қажет. Жас педагогтерді қолдау мақсатында «Жас мұғалімнен – жасампаз ұстазға» жобасы әзірленуде. Бұл жоба аясында әр жас педагогтің кәсіби өсу маршруты құрылып, менторлық жұмыстар ұйымдастырылады», деп атап өтті А.Адамбекова.
Білім басқармасы басшысының сөзіне сүйенсек, биыл 10 мектеп іске қосылады. 9 білім беру нысанына 4,9 млрд теңгеге күрделі жөндеу жұмыстары жүргізілген. 90 мектепке жаңа модификациялық кабинет алынуда. Барлық оқушы оқулықпен қамтамасыз етілген. Сонымен қатар ерекше білім беру қажеттілігі бар бала саны – 7 264, оның ішінде мүгедек бала – 2 059. Бүгінге дейін 996 балаға қызмет көрсетілсе, кезекте 1 060 бала тұр. Осы мәселені шешу үшін 2023 жылға Талдықорған қаласында және Көксу аудандарында психологиялық-педагогикалық түзету кабинеттерін ашу жоспарланып отыр.
Жиын барысында техникалық және кәсіптік білім беру жүйесі бағытындағы мәселелер де сөз етілді. Жетістіктер сараланды. Сонымен қатар арнайы шақыртылған білікті мамандардың дәрістері тыңдалды. Одан кейін үздік жетістік көрсеткен ұстаздар марапатталды.
Айта кетейік, жалпы облыстағы 340 мектепте 15 691 мұғалім, 405 мектепке дейінгі білім беру ұйымында 3 328 педагог жұмыс істейді. Өңірдегі педагог кадрларға қажеттілік 176 бірлікті құрап отыр.
Жетісу облысы
