Орал қаласының дәл іргесінде, Шаған өзенінің жағасында балалар демалысына арналған үйлер 1937 жылдан салына бастапты. Ендеше биыл «Атамекен» балалар мен жасөспірімдер туризм және экология орталығына 85 жыл деп айтуға негіз бар екен!
Атына заты сай орталық соңғы жылдары жас өренді туған жерін сүюге, табиғатпен бір болып, белсенді өмір сүруге баулып келеді.
Мысалы, биылдың өзінде мұнда Орал қаласындағы 52 мектептің 10-сынып оқушылары әскери оқу-далалық жиын өткізді. Яғни 900 бозбала тұңғыш рет ересек өмірдің дәмін татып, Отан алдындағы жауапкершілікті сезінді.
Ал үш ай жазда бұл жерде оқушылардың ойын-күлкісі бір тынбады. Жеті ауысымға бөлінген демалыс лагерінде жалпы саны 1 мыңнан аса ұл-қыз демалып үлгеріпті. Олардың басым бөлігі – оқу озаттары, дарынды балалар және көмекке мұқтаж, ата-ана қамқорлығынсыз қалған балалар болған.
«Атамекен» орталығының басшысы, «Үздік өлкетанушы» төсбелгісінің иегері, өңірде туризм саласын дамытуға ерекше үлес қосып жүрген Айболат Құрымбаев «әр бала туған өлкенің табиғат таңғажайыптарын, тарихын, мәдениетін жетік білуі керек» деген принцип ұстанатын азамат. Сондықтан да «Атамекен» орталығына келген ұл мен қыздың аз уақыт ішінде өзгеріп, тамаша демалыспен бірге эстетикалық тәрбие алып шығады.
– Биыл біздің орталықта демалған оқушылар мағыналы да мәнді демалыс өткізді деп сеніммен айта аламын. Бұл жерде көріп, үйренген дағдылары алдағы өмірде де пайдалы болары анық. Мысалы, олар лагерь аумағындағы әр нәрсенің қай жерде, қалай орнатылғанын және мән-мағынасын түсіндіретін «Әр заттың өз орны бар» атты ойын ойнайтын. Сондай-ақ қаладағы музейлерге саяхат жасады, туристік, спорттық ойындарға қатысты, өзенде байдаркамен серуендеп, ұлттық қолөнер мектептерімен де танысты. Туған жер табиғатын қорғайтын экологиялық үйірмелерге қатысып, ғылыми-зерттеу жұмыстарының да дәмін татты, – дейді Айболат Шамұратұлы.
«Атамекен» орталығында биылғы каникул қызығын көрген 354 бала – ата-анасының қамқорлығынсыз қалған немесе жетім балалар екен. Сондай-ақ жазғы сауықтыру лагерінде Маңғыстау, Атырау, Ақтөбе облыстарынан, Ресей Федерациясының көршілес аудандарынан және Батыс Қазақстан облысындағы ауылдардан арнайы жолдамамен келген балалар да естен кетпейтін демалыс күндерін өткізген. Мұндағы ұйымшылдық, ішкі бірліктің күшті болғаны сондай, Орал қалалық дене шынықтыру және спорт бөлімі «Балалар жылына» арнап өткізген спартакиадада атамекендіктер командасы 1-орынға ие болыпты!
– Биыл 1 маусым мен 21 тамыз аралығында «Атамекен» орталығында барлығы 1049 бала демалды. Оның ішінде аз қамтылған 355 бала тегін демалса, дарынды 200 оқушы 50% жеңілдікпен, 494 бала ақылы есепте демалды. Орталық аумағында 5 күндік «Мирас», «Рахат» күркелі лагері, «Қайсар» спорттық, әскери-патриоттық ерлік лагері ұйымдастырылды. 1-25 маусым аралығында өткен «Мирас» күркелі лагеріне 600 бала қатысса, 27 маусым мен 16 шілде аралығында ұйымдастырылған «Қайсар» спорттық, әскери-патриоттық ерлік лагерінде 230 бала болды. Мұнда оқушылар шатыр құруды, туристік құрал-жабдықтарды қолдануды, бағдарлауды үйренді, – дейді «Атамекен» орталығының әдіскері Ақмарал Жолдыбайқызы.
Өлкетану – өскелең ұрпақты туған жерін сүюге, өз Отанының патриоты болуға баулитын ерекше сала екенін айттық. Айболат Құрымбаев басқаратын «Атамекен» балалар мен жасөспірімдердің туризм және экология орталығы өңірдегі жалпы және қосымша білім беру саласын өзара үндестіріп, Батыс Қазақстан облысының негізгі туристік брендін қалыптастыратын жаңа бағдарлама ұсынып отыр. Әрине, бұл жерде кадр мәселесін жүйелі шешу, материалдық базаны нығайту, бағдарламалық-методикалық құжаттар жасау, үйірме жұмыстарын жандандыру, спорттық бағдарлау бағытындағы жұмыстарды дамытып, жасанды жартас салу, жүйелі мерзімді басылым шығару секілді сан-салалы міндеттер тұр.
Батыс Қазақстан облысы
