Ауылдағы ағайынның денсаулығын дұрыс күтпейтіні, оған лайықты медициналық инфрақұрылымның да шалғайдағы елді мекендерде дұрыс жасақталмағаны көптен бері айтылып жүрген көкейкесті мәселе еді. Ел халқының жартысына жуығын ауыл халқы құрайтындықтан, бұл жағдайға баса мән беріп, жолға қою өте маңызды. Аталған мәселені Президенттің қатысуымен өткен жиындарда өзім де көтергенмін. Сондықтан осы Жолдау аясында нақты тапсырмалар арқылы ауыл медицинасын жақсарту бағытында ілкімді іс-шаралар қолға алынатынына қуанып қалдым.
Мемлекет басшысы айтқандай, бүгінде елімізде 650 елді мекенде емдеу мекемесі жоқ. Бұл – біле-білгенге үлкен мәселе. Өйткені осынша ауыл-аймақтың халқы сапалы медицинадан тыс қалып отыр деген сөз. Енді осы олқылық жойылып, Жолдауда жүктелген тапсырма бойынша алдағы екі жылда бұл ауылдарда медициналық және фельдшерлік-акушерлік бөлімшелер салынатын болды, сондай-ақ оған қажетті құрал-жабдықпен толық қамтамасыз етіледі. Өз кезегінде осы бастама арқылы мемлекет 1 млн-нан аса адамның алғашқы медициналық-санитарлық көмек алуына мүмкіндік жасайды.
Ауыл-аймақпен қатар аудандағы ауруханалардың да ахуалы әжептәуір жақсарады. Айталық, Жолдауда 32 аудандық аурухана заманға сай жаңарып, ауданаралық көпбейінді мекемеге айналатыны айтылды. Бұл ауруханаларда инсульттен емдеу орталықтары, хирургия, жансақтау және оңалту бөлімдері ашылады. Осылайша, 4 млн-нан аса адамға көрсетілетін медициналық қызметтің сапасы артады. Сонымен қатар телемедицина бағытын дамыту жолға қойылып, шалғайда тұратын халыққа сапалы медициналық қызмет көрсетіледі. Президент айтқандай, мұның бәрі ұлт денсаулығын сөз жүзінде емес, іс жүзінде жақсартуға бастайды.
Осы орайда ерікті медициналық сақтандыру жүйесін енгізуді де жақсы бастама деп атап өтер едім. Себебі медициналық сақтандыру жүйесіне халық тарапынан туып жатқан арыз-шағым, қынжылыстар аз болмай тұр. Басынан сын арылмай қойған бұл медициналық көмектің мемлекет кепілдік берген және сақтандыру пакеті деп екіге бөлінгені аса тиімді бола қоймағанын уақыт көрсетті. Мұны Президент дұрыс айтып отыр. Алда бұл мәселенің де оң шешімін табатынынан үміттенеміз.
Абай БАЙГЕНЖИН,
«Ұлттық ғылыми медициналық орталығы» АҚ басқарма төрағасы
