Суретті түсірген Ерлан ОМАР, «ЕQ»
Экономикада азаматтардың өз ісін ашуға арналған жеке бастамаларын ынталандыруға көңіл бөлінбек. Сонымен қатар салық режімін жеңілдету, монополистер қызметінің тарифін төмендету, ауыл шаруашылығындағы субсидиялауды тиімді ету сынды саясат жалғасады. Әрбір қазақстандық үшін мемлекетке және оның табысына қатыстылықты сезіну өте маңызды. Ал Президенттің бұған жауабы дайын: мемлекеттік активтерге халықтық IPO енгізу, «Ұлттық қор – балаларға» бағдарламасын жүзеге асыру, жастардың жұмысқа тұруына көмектесу, 2,5% үстемемен несие беру, «Әлеуметтік әмиян» картасы түрінде атаулы әлеуметтік көмектің ашық жүйесін кіргізу, сыбайлас жемқорлыққа қатысы бар шенеуніктердің заңсыз жолмен тапқан табысынан мемлекеттік бюджетке түскен қаржысы есебінен заманауи мектептер салу.
Қасым-Жомарт Тоқаевтың Жолдауында айтылған алда болатын саяси, әлеуметтік, экономикалық және құқықтық салалардағы реформалар азаматтық қоғамның өкілдеріне осы өзгерістердің жүзеге асуын ұйымдастыруға, қоғамдық бақылау жасауға, сондай-ақ ақпараттық-насихат жұмыстарын жүргізуге мүмкіндік беретін халықтық жоба деп нық сеніммен айтуға болады. Осы орайда, біз – қоғамның белсенді бөлігінің өкілдері күрделі және маңызды жұмыста мемлекеттің әріптесі бола білуіміз керек.
Гүлнәр ҚҰРБАНБАЕВА,
Қарағанды облыстық кәсіпкерлер қауымдастығының президенті,
облыстық қоғамдық кеңес мүшесі
ҚАРАҒАНДЫ