Вице-министр Алма Мұқанова мәжілісте «Қазақстан Республикасындағы Адам құқықтары жөніндегі уәкіл туралы» Конституциялық заң жобасын таныстырды.
«Уәкілге парламент палаталарының кез келген, ашық та, жабық та, бірлескен және бөлек отырыстарына қатысу және сөз сөйлеу құқығын беру ұсынылады. Сондай-ақ уәкілдің құзыретін күшейту мақсатында оның арнаулы әлеуметтік қызметтер көрсететін ұйымдарға және қылмыстық-атқару жүйесі мекемелеріне кедергісіз бару құқығы бекітіледі», деді Мұқанова.
Құжатта уәкілдің құзыреттілігін күшейту және оның қызметін ұйымдастырудың тиімділігін арттыру ережелері көзделген.
Сонымен қатар, уәкіл азаматтың Конституцияда бекітілген құқықтары мен бостандықтарын қозғайтын нормативтік құқықтық актілердің Конституцияға сәйкестігі мәселесі бойынша Конституциялық сотқа жүгінуге құқылы.
