Әйелдер арасында өтетін жарыста Қазақ елінің намысын әлемдік рейтингте 14-орында тұрған Жансая Әбдімәлік (2495 ұпай) қорғайды. Регламентке сай қабылдаушы ел турнирге тағы бір ойыншыны қосуға құқылы. Бұл ретте таңдау Бибісара Асубаеваға (2439) түсті. Қазіргі кезде ол үздіктер тізімінде 32-орынды иеленуде. Әрине, оған қарағанда Динара Сәдуақасованың (2446) көрсеткіші біршама жақсы. Тәжірибелі шахматшымыз бұл күндері 28-сатыға жайғасты. Алайда Динара соңғы кездері дүбірлі додаларға сирек қатысып жүр. Сол себепті де ұлттық құрама бапкерлері Бибісараға сенім артуды құп көрді. Қалай болғанда да, біз жерлестерімізге үлкен үміт артып отырмыз. Өз елімізде, өз жерімізде өтетін байрақты бәсекеде қазақ қыздары намысты қолдан бермейді деген ойдамыз.
Нұр-Сұлтанға келетін «ойлылар ойыны» өкілдерінің төртеуі – ресейліктер. Олар – Александра Горячкина (ФИДЕ рейтингінде №2 орын, 2579 ұпайы бар), Екатерина Лагно (№4, 2547), Александра Костенюк (№11, 2521) және Полина Шувалова (№12, 2510). Сонымен қатар бақ сынаушылар арасында қытайлық Тань Чжунъи (№9, 2525) мен Чжу Цзиньэр (№21, 2464), польшалық Алина Кашлинская (№15, 2504), германиялық Динара Вагнер (№116, 2341) мен Элизабет Петц (№13, 2484) және үндістандық Конеру Хампи сынды әйгілі шахматшылар бар. Олардың рейтингте жоғары орындарға жайғасқандарын айтпағанда, кейбірі кезінде әлем чемпионы атағынан да үміткер болған.
Міне, елорда төрінде өтетін дүбірлі додада біздің бұрымдыларға осындай атақты шахматшылармен шеберлік байқасуға тура келеді. Осы жарысты тамашалау үшін еліміздің Мәдениет және спорт министрі, ФИДЕ президенті және тағы басқа да лауазымды тұлағалар келеді деп күтілуде. Ең бастысы, Women Grand Prix-2022 турнирлері сериясында ең көп ұпай жиған ойыншы әлемдік тәж үшін таласу мүмкіндігіне ие болады.
