Ауыл шаруашылығы министрлігінің ресми мәліметіне сүйенсек, орташа өнімділік гектарына 12,3 центнерді құрап отыр. Әзірше 7,5 млн тонна астық бастырылған. Бұл өткен жылғы көрсеткіштен 2,5 млн тоннаға артық. 2021 жылдың 1 қыркүйегінде 5,1 млн тонна бастырылған еді.
Биыл өнімділіктің өсуіне ауа райының қолайлылығы, сондай-ақ көктемгі дала жұмыстары кезінде агротехникалық шаралар кешенін уақтылы жүргізу және өсімдіктердің өсіп-өну кезеңінде қолайлы фитосанитариялық жағдайды қамтамасыз ету ықпал еткен.
Министрліктің мәліметінше, ішкі тұтыну мен қазақстандық нарықты қамтамасыз етуге және бидайдың бір бөлігін экспортқа жөнелту үшін астықтың жеткілікті көлемі алынады деп болжанып отыр.
Қаржыландыруға келетін болсақ, 2022 жылы бюджеттік кредит 140 млрд теңгені құрады. Бұл – 2021 жылғы деңгейден екі есе жоғары. Астықты форвардтық сатып алу шеңберінде қаржыландыру 100 млрд теңгеге дейін көбейді немесе бір жыл бұрынғыға қарағанда 2,5 есе артты.
Мемлекет басшысының тапсырмасын іске асыру аясында «Жасыл даму» АҚ қаражаты есебінен ауыл шаруашылығы техникасын жеңілдікпен несиелеу тетігі пысықталғанын атап өту қажет. Жеңілдікті лизингке шамамен 40 млрд теңге бөлінді.
Бұған қоса егін жинау жұмыстарын уақтылы жүргізу үшін ауыл шаруашылығы тауарын өндірушілерге 423,5 мың тонна жеңілдетілген дизель отыны бөлінді.
Министрлік егін жинау жұмыстарын табысты жүргізу мәселесін тұрақты бақылауда ұстап отыр. Ол үшін ведомствода барлық туындаған мәселені уақтылы шешуге арналған жедел штаб жұмыс істейді.
