Аты жоқ көрме немесе мұңлы, ойлы, келісті келбеттер

Апта ортасынан ауған кезде, яғни 15 мамырда бір топ алматылық суретші адамдардың сан алуан келбеттерінен құралған «Аты жоқ көрме» ұйымдастырып, живопись, графикамен салынған, ерекше мүсіндерден тұратын ауқымды туындыларын ұсынғалы отыр.  «Ақ рояль» галереясында өтетін портреттер шеруінде образдық, психологиялық, эмоциялық, философиялық бейнелер шеп құратын болады. Мұндай тамаша туындылардың авторлары бұл күнде елімізге белгілі болған, қаламы ұшталған, ойы ұшқыр, әрқайсысы қайталанбайтын қолтаңбаға ие суретшілер. Бұлар – қылқалам шеберлерінің қуатын құрастыра келе, достар мен мүдделестерді бір көрме аясына біріктіріп, қалып пен ойға ие, бірегей галерея жасауға қол жеткізген таланттар десе де болады. Көрмеге суреттері қойылған авторлар дәстүрлі де тың соқпақтардан соны келбеттер іздеп, дәстүрлі емес әдістерден тірі де батыл, қызықты бейнелерді тудырған. Көрмені ұйымдастырушылар бұл идеяға «Келбет жасау» жобасы бастамашы болғанын алға тартып отыр. Ал келбет құрау – суретшінің бірінші кезектегі жұмысы болғандықтан, ол баспалдақтарға бастап, «Аты жоқ көрме» дүниеге келді. Айнаш ЕСАЛИ, «Егемен Қазақстан». АЛМАТЫ.