Орталық коммуникациялар қызметінде өткен брифингте өңірлердегі өрттің алдын алу мәселесі сөз болды. Ең әуелі Қостанай облысындағы ахуал баяндалды. Төтенше жағдайлар министрлігі Өртке қарсы қызмет комитетінің басқарма бастығы Ерлан Төрегелдиевтің айтуынша, қызыл жалын толығымен сөндірілген. Бірақ босаңсуға жол жоқ. Бүгінде тұтану қаупі жоғары учаскелер бақылауға алыныпты. Сонымен елді елең еткізген Қостанайдағы өрттің аумағы 43 мың гектардан асқан. Өрт кезінде 91 үйге зақым келген. Екі мыңға жуық адам қауіпсіз ғимаратқа көшірілген. Өртті ауыздықтауға 224 техника, 6 әуе кемесі, 5 өрт сөндіру пойызы, құзырлы орган құрамынан 2 мыңнан астам адам жұмылдырылған. 11 адам (6 тұрғын, орман шаруашылығының 1 қызметкері, әкімдіктің 1 қызметкері, ТЖМ 3 қызметкері) жеңіл және орташа дәрежедегі жарақат (күйік, улану) алды. Жасы 80-нен асқан мүмкіндігі шектеулі қария көз жұмды.
Алматы қаласындағы Кеңсай маңында шыққан өрт Медеу ауданы Сәрсенбаев көшесіндегі үйлерге қауіп төндірген. Көк түтінді әуелі Кеңсай-1 шағын ауданының тұрғындары байқап, өрт сөндірушілерге хабарласқан. Мамандар жедел жеткенімен беткейлердің биіктігі, жердің күрделі рельефі жұмысты қиындатқан. Оның үстіне жел соғып, жанған шөптің жалыны биіктігі 3 метрлік бұталарға көшкен. Тілсіз жауды ауыздықтауға Төтенше жағдайлар департаментінен 100-ден астам өрт сөндіруші, 8 техника жұмылдырылды. Кеңсай-2 зиратының аумағында құрғақ шөп өртенгенмен, қабірлер зақымдалмады. Төтенше жағдайлар департаментінің өкілдері алматылықтарға тауда от жақпауды, темекі тұқылын тастамауды ескертеді. Айтпақшы бұл оқиғадан кейін әлеуметтік желілерде белгісіз азаматтың қасақана өрт қойып жатқан әрекетті жарияланған еді. Алматы полициясы Көктөбедегі өрт кезінде ағаштардың маңында тұрған ер адамды ұстағанын мәлімдеді. Бостандық ауданындағы өрт орнында бой көрсеткен ер адам бейнекамера мен куәгерлік айғақтар көмегімен анықталған. «Бұл 1968 жылы туған азамат. Ол от жаққанын мойындады», деп хабарлады ведомство. Ер адамның сөзінше, ол мас күйде болған және консервілерді жылытқысы келген, бірақ өрт бұталарға өткен соң қорыққаннан кетіп қалған. Оқиғаның мән-жайы анықталуда.
Бүгінде қызыл жалынға оранған аймақтарда жағдай тұрақты. Ендігі жерде арнайы комиссия өкілдері шығын көлемін анықтауға кіріспек. Құқық қорғау органдары болса кінәлілердің «соңына түспек». Не десек те, орман шаруашылықтарындағы, Төтенше жағдайлар министрлігіне қарасты құрылымдардағы техника паркінің жағдайы мәз емес. Оны министрліктің өзі де жасырмайды. Бүгінде жергілікті әкімдіктің балансындағы орман шаруашылықтарының қажетті құралдармен жабдықталу көрсеткіші 67 пайыз, ал Экология, геология және табиғи ресурстар министрлігінің құрамына енетін шаруашылықтардағы көрсеткіш 60 пайызға тең екен. Кінәні табиғаттың тосын мінезімен ғана байланыстыруға болмас. Бұл оқиғалардан Төтенше жағдайлар министрлігі сабақ алып, кешенді жоспарларын ұсынады деген сенім мол.
