Көркем гимнастикадан әлем чемпионаты 1963 жылдан бері үздіксіз ұйымдастырылып келеді. Алғашқы жарысты Чехияның Прага қаласы қабылдады. Одан кейін аталған жарыс әлемнің әр қиырында өтті. Спорттың бұл түрінің фавориттері ресейліктер екені еш дау туғызбаса керек. Келмеске кеткен КСРО-ның қоса алғанда, олар барлығы 286 (141 алтын+91 күміс+54 қола) жүлде олжалады. Болгарияның да жеңіспен өрілген бай дәстүрі бар. Бұл елдің өкілдері 167 (66+53+48) рет жеңіс тұғырына көтерілді. Украинаның көрсеткіші де жаман емес. Тәуелсіздікке қол жеткізгелі бері олар 89 (25+28+36) мәрте үздіктер қатарынан көрінді. Сондай-ақ төрткүл дүниенің теңдессіздері жиналған тартыста Беларусь (9+24+36), Италия (7+15+5), Испания (7+11+18), Германия (5+6+3), Чехия (4+5+8), Грекия (3+1+2), Солтүстік Корея (1+2+4) және Жапонияның (1+1+1) әнұраны шырқалды. Ал жүлде алғандар қатарында Әзербайжан (0+1+7), Израиль (0+1+2), Қытай (0+1+2), Франция (0+0+2), Румыния (0+0+1) және Оңтүстік Корея (0+0+1) құрамалары бар.
Өздеріңіз байқағандай, әлемдік додада олжа салу бақыты бар-жоғы 17 мемлекеттің өкілдеріне бұйырған екен. Өкінішке қарай, солардың қатарында қазақстандық бұрымдылар жоқ. Жерлестеріміздің арасынан ең үздік нәтиже Әлия Юсуповаға тиесілі. Шымкенттің сұлуы әлем чемпионатында алғаш рет 2001 жылы Мадридте бой көрсетіп, одан кейін бірер жыл бойы ел намысын қорғады. Алғашқы жарысында Юсупова көпсайыстың қорытындысы бойынша сегізінші сатыға табан тіресе, 2003 жылы Будапешт және 2005 жылы Бакуде жетінші орындарды иеленді. 2007 жылы Патрыда озық алты гимнасшының қатарына қосылды.
Әлияның әлемдік додада жолы болмағанымен, өзге байрақты бәсекелерде елеулі табыстарға қол жеткізді. Мың бұралған қазақ қызы 12 рет құрлық чемпионы атанып, Азия ойындарында екі алтын мен екі күміс медальды олжалады. Дүниежүзілік Универсиада мен Бүкіләлемдік ойындарда сан мәрте жүлделі орындарды еншіледі. 2004 жылы Афина Олимпиадасында төртінші орынды иеленсе, 2018 жылы Бейжіңде бесінші сатыға жайғасты. Қазіргі кезде Әлия Мақсұтқызы Қазақстан ұлттық құрама командасының бас бапкері қызметін атқаруда.
Соңғы әлем чемпионаты былтыр Жапонияның Китакюсю қаласында өтті. Сол жарыста сарапқа салынған тоғыз алтынның жетеуін Ресей құрамасы жеңіп алды. 23 жастағы Дина Аверина жекелеген жаттығуларда төрт алтын алса, егізі Арина екеуі командалық сайыста да алдарына жан салмады. «Таспада» белоруссиялық Алина Горносько топ жарды. Топтық бәсекедегі бас жүлденің екеуін ресейліктер жеңіп алса, біреуі Апеннин түбегінен келген аруларға бұйырды. Күншығыс елінде барлығы төрт елдің бұрымдылары ғана жеңіс тұғырына көтерілді. Олар – Ресей (7+4+2), Италия (1+3+1), Беларусь (1+2+4) және Жапония (0+0+2). Сол жарыста Қазақстанның бірде-бір гимнасшысы үздіктер санатына қосыла алмады.
