Петропавлда «Қызылжар» Шымкенттің «Ордабасысын» 4:0 есебімен ойсырата ұтты. 12-минутта Максим Чиканчи алғашқы голды соқса, үзілістен кейін де алаң иелері қарқындарын бәсеңдеткен жоқ. Нәтижесінде, Мусса Коне, Валерий Каршакевич және Элгуджа Лобжанидзе нысананы дәл көздеді. Осы жеңістің арқасында ұпай санын 21-ге жеткізген Солтүстік Қазақстан облысының өкілдері жарыс кестесінде 11-орынға көтерілді. Оңтүстік өңірінің ойыншылары 7-сатыға жайғасты.
Түркістанда өткен бәсекеде «Қайрат» «Тұранды» 3:1 есебімен тізе бүктірді. Бұл ойында алматылықтардың сапындағы бразилиялық легионер Жоао Пауло хет-трик жасады. Ол қарсыластарының қақпасын 33, 41 және 60- минуттарда дәл көздеді. Алаң иелері арасынан Олжас Керімжанов 78-минутта гол соқты. Осы кездесуден кейін 30 ұпайды қоржынға салған «Қайрат» бір сатыға жоғарылап, 5-орынға көтерілді.
