Аймақтар • 15 Қыркүйек, 2022

Бақша баптап, құс өсір

44 рет көрсетілді

Ақтөбе облысының әкімі Ералы Тоғжанов Әйтеке би, Ырғыз, Хромтау аудандарына сапарында жергілікті әкімдерге әр ауылда жеке қосалқы шаруашылықтар ұйымдастыру жобасын тез арада әзірлеуді тапсырды. Бұл ауыл тұрғындарының басқа жаққа көшуі мен жұмыссыздық деңгейін азайту және халық тұтынатын азық-түлік түрлерін молайту мақсатында қолға алынып жатқан шаруа.

«Қазір ел Үкіметі жеке қосалқы шаруашылықтарды дамыту жобасын қолға алды. Қанатқақты жоба бойынша өз ауласында қосалқы шаруашылық ұйымдастырған ауыл тұрғыны үйін кепілдікке қойып, 2,5 пайыз жеңілдікпен несие ала алады. Осы кезге дейін көп жағдайда қаржы ұйымдары ауылдың ескі үйлерін кепілдікке алмайтын болғандықтан, ауыл адамы үшін жеңілдетілген несие алу қиынға түсетін. Ендігі жерде қосалқы шаруашылық­тар­ды қаржыландыруды әлеу­мет­тік-кәсіпкерлік корпора­ция­лары тікелей жүзеге асыра­ды. Осы жобаға тұрақты табысы жоқ, аз қамтылған отбасылар да қатысады, соның ішінде жұ­мыссыз жастарға артықшылық беріледі. Мақсатымыз – ауыл тұрғындарының  жеке қосал­қы шаруашылық жүргізуіне барынша қолдау көрсету. Сол үшін  әр ауылдық округ әкімі өз  елді мекеніндегі отбасылар­дың жеке қосалқы шаруашы­лық ұйымдастыра алатын­дай мүмкіндігіне талдау жүргізгені жөн. Бір сөзбен айтқанда, әрбір аула  отбасының кіріс көзіне айналуға  тиіс.

Айта кету керек, еліміздің әр өңірінде жеке қосалқы шаруашылық ұйымдастыру жағы түрліше қалыптасқан. Мәселен, солтүстік өңірлердегі ауыл тұрғындары көбінесе құс шаруашылығына артықшылық береді. Ал Ақтөбе облысында ауыл адамдарының мал бағып, көкөніс, жеміс ағаштарын өсіріп, табыс табу жолдарын тезірек жолға қою керек. Бұл үшін арнайы мамандарды да шақырып, кеңес беруді де ұйымдастырамыз», деп тапсырма берді облыс әкімі Ералы Тоғжанов.

Сонымен қатар өндірістік аудан­дардағы ірі кәсіпорындар ай­­наласында шағын және ор­та кәсіпкерлік нысандарын құ­ру қолға алынады. Бұл аудан эко­н­омикасының дамуы­на тың сер­­пін берері анық. Өн­ді­ріс­­тік ны­сан­дардың жанында кә­­сіп­­­кер­лік белдеуін орнату мұ­най және хромит кенін өн­ді­ре­тін Хромтау, Мұғалжар, Темір аудан­дары үшін қолайлы мүм­кіндік болғанымен, Ырғыз, Әйтеке би сияқты бірыңғай мал шаруашылығымен айналысатын, климаттық жағдайы күрделі, су тапшылығын сезініп отырған аудандарға оңай болмасы анық.

Құс, балық өсіру, бақша шаруашылығын дамыту арқылы қосалқы шаруашылықтар ұйым­дастыру сауатты түрде қол­ға алынса, өңірдегі азық-түлік белдеуі нық қалыптасары сөзсіз. Осы кезге дейін жергілікті тауар өндірушілері азық-түліктің негізгі түрлерімен өңір тұрғын­дарын толық қамтамасыз ете алмай келеді. Мәселен, тауық жұмырт­қасы сырттан тасымалдана­ды. Былтыр жергілікті бюджеттен тауық жұмыртқасын са­тып алуға 480 млн теңге субсидия бөлінсе де, 900 мыңға жуық тұр­ғынның қажеттілігін толық өтей алған жоқ. Соңғы күндері қаладағы супермаркеттерде он дана жұмыртқаның баға­сы 400 теңгеден асып барады. Күн салқындаса, жұмыртқа баға­сы да шарықтай берері анық. Қалай болғанда да, сырттан та­сымалданатын азық-түлік баға­сын реттеудің бір амалы –  жеке қосалқы шаруашылықтар жұ­мысын жүйелі түрде жолға қою.

Бүгінде Ырғыз ауданында жастардың жұмыссыздық деңгейі 1,5%-ды құраса, 1 200 жас өзін-өзі қамтығандар қатарында. Ресми түрде еш жерде жұмыс істемейтін ауыл тұрғындары үшін жеңілдетілген несие алу арқылы шаруашылық түрлерін ұйымдастыру мамандардың көмегімен іске асырылатын жоба.

Дотацияда отырған ауданға ту­ризмді дамыту да таптырмас мүм­кіндіктің бірі. Ауданда 1 млн 463 мың гектар мемлекеттік «Ырғыз-Торғай»  резерваты орналасқан. Киіктердің Бетпақдала тұқымы жазда осы мекенді жайлайды. Инспекторлардың айтуынша, былтыр резерват құмында 110 мың киік қыстап шыққан. Олар биыл 150 мың киік қыстайды деген болжам айтып отыр.  Киіктер  жаз бойы еш шаруашылыққа кедергі келтірмеген. Сондай-ақ  резерват көлдерінде құстың 200 түрі мекендейді, соның ішінде «Қызыл кітапқа» енгізілген қызғылт бірқазан сияқты сирек құс бар. Резерваттың сулы-батпақты көлдері – Сібір, Памир бағытына ұшатын құстардың аялдайтын мекені. Осы көлдерді балықтың сегіз түрі, қосмекенділердің төрт түрі мекендейді. Құстардың да, киіктердің де көктемгі-күзгі қоныс аудару жолындағы осы табиғи  белдеу ішкі туризмге сұранып-ақ тұрған жер. Екі жылдан бері  Ақтөбе облыстық білім басқармасы мектеп оқушыларының жазғы демалысында  өңірдегі көрікті жерлерге үш бағыт бойынша сапарлар ұйымдастырып жүр. «Ырғыз-Торғай» резерваты – мектеп оқушылары үшін ұйым­дастырылған экотуризмнің бір бағы­ты­на айналды. Өңір басшысы «Ырғыз-Торғай» резерваты мен 1 млн жыл бұрын метеорит құла­ған Жаманшың кратеріне турис­тік маршруттарды әзірлеуді тапсырды.

 

Ақтөбе облысы

Соңғы жаңалықтар

Ұқсас жаңалықтар