Коллажды жасаған Қонысбай ШЕЖІМБАЙ, «EQ»
Облыс әкімі баспасөз қызметінің хабарлауынша, кездесу барысында космомониторинг саласындағы ынтымақтастық байланыстарды кеңейту мәселесі талқыланды. Өңір басшысы Жетісуда ауыл шаруашылығына ерекше ден қойылып отырғанын жеткізді. Сондықтан ғарыштан мониторинг жасау мақсатты пайдаланылмай жатқан ауыл шаруашылығы жерлерін анықтауға септігін тигізіп, бұл үдеріске жаңа қарқын бермек.
А.Айымбетов республикалық бюджеттік бағдарламалар аясында көрсетілетін тегін қызметтерге тоқталып, жуырда іске қосылған Kaznedra және JerInSpectr цифрлы жаңа платформалары туралы айтты.
Бизнесті дамыту және халықаралық ынтымақтастық департаменті Халықаралық ынтымақтастық басқармасының бастығы Рустам Абдрахмановтың сөзіне сүйенсек, «Қазақстан ғарыш сапары» ҰК» АҚ ғарыш мониторингі саласында 40-тан астам бағытта жұмыс істейді, соның 8-і алқаптарды, ормандарды, су нысандарын, жайлауларды, жер пайдалануды, төтенше жағдайларды, қалдықтар мен жер қойнауын пайдалануды мониторингілеу бағыттарында қызмет көрсетеді. Мәселен, өсімдіктер космомониторингі күн сайын өсімдіктің жай-күйін, ластануы мен шығымдылығын бағалауға қатысты ақпарат жинауға мүмкіндік береді, сондай-ақ өсімдіктің түрін анықтауға көмектеседі. Ал суармалы жерлердің мониторингі өсімдіктердің суарылу көлемін және суды тұтынуын қадағалайды. Бұл – ғарыш мониторингінің зор мүмкіндіктерінің шағын бір бөлігі ғана.
«Экологиялық мәселелер бізді де алаңдатады. Өңірде қараусыз қалған қалдық қоймалары аз емес, қазір бізге инвесторлар рекультивация жасауға ұсыныс білдіріп жатыр. Бізді қалдық қоймаларының жағдайы, жер қойнауындағы қор көлемі сияқты көптеген мәселе толғандырады. Осы бағытта да сіздермен бірігіп жұмыс істесек», деді облыс әкімі Б.Исабаев.
Р.Абдрахмановтың айтуынша, арнайы тапсырыс берілсе, ғарыш мониторингі құралдарының нәтижесінде мұндай бағытта да толық ақпарат жинақтап беруге мүмкіндік бар.
Б.Исабаев облыс ғарыш мониторингімен ауыл шаруашылығы, стихиялық қоқыс орындарын, заңсыз құрылыстар мен жер қойнауын пайдалануды анықтау бойынша ынтымақтаса жұмыс істеуге әзір екенін жеткізді. Төтенше жағдай орын алған жағдайда орман және дала өрттерінің таралу бағытына болжам жасау, сол сияқты заңсыз ағаш кесу оқиғаларын анықтау мәселесі де өзекті. Осыған байланысты тиісті облыстық басқармалар мен департаменттердің басшыларына тапсырмалар берілді.
«Бұл бағдарламаны толық қолдаймыз. Ол, расында да, пайдалы, бізді қызықтыратын нысандарды анықтауға кететін уақытты бірнеше есе қысқартады. Ортақ мәселелерді бірлесіп талқылағанымызға қуаныштымын. Енді әр бағыт бойынша тығыз байланыс орнататын боламыз», деп сөзін түйіндеді облыс әкімі.
«Қазақстан ғарыш сапары» ҰК» АҚ төрағасы Айдын Айымбетов ақпараттың ашықтығы мен қолжетімділігін қамтамасыз ету, сол сияқты бюрократия мен жемқорлық тәуекелдерін азайтуға ықпал ету ғарыш мониторингінің маңызды міндеттерінің бірі екенін атап өтті.
Жетісу облысы
