Пікір • 27 Қыркүйек, 2022

Жауапкершілік бәрімізге жүктеледі

118 рет көрсетілді

Президенттің 1 қыркүйектегі Жолдауында Жаңа Қазақстандағы мемлекетіміздің экономикасы мен әлеуметтік мәселелеріне ерекше мән беріліп отыр. Қазақстанның әлемдік геосаяси үдерістерге қосып жатқан үлесі баршаға белгілі.

Кез келген ел өзінің табиғи байлықтарын дұрыс пайдалана білуі қажет. Елімізде өзен-көлдермен қатар Каспий теңізі де жатыр. Каспий теңізін қоршап жатқан бес мемлекеттің қатарындамыз. Бұл жағдайды да ескерген Президент Транс­каспий халықаралық көлік бағы­тының маңыздылығы тура­лы сөз қозғап, оны әрі қарай дамы­тып, жаһандық логистика компанияларының ортақ іске қосылуы туралы айтты.

Маңызды құжатта көтерілген мәселенің бірі – ауыл шаруа­шылығын дамыту. Бұл салада біраз жұмыс атқарылды. Қолға алынған ауқымды іс-шараларға да көп уақыт өтті. Алайда өкі­ніш­ке қарай, ауыз толтырып ай­та­тындай нәтижелерді кейде көре алмаймыз. Ауыл шаруа­шы­лығы мемлекетіміз үшін әрқашанда маңызды сала болып қала береді. Өйткені бұл сектордың тұрақ­ты дамуы азық-түлік қауіпсіздігі­не тікелей әсер ететіні туралы Мем­лекет басшысы жиі айтып жүр. Осыған орай ауыл халқына бөлінетін субсидиялар қайта қаралып, жаңа бағдарламалар жасауға жол ашылды.

Құжатта ерекше маңыз берілген тағы бір бағыт – заң және тәртіп. Мемлекеттіліктің ең басты стандарттарының бірі заң үстемдігі болса, қоғамда орнайтын тәртіп тұрақтылық пен қауіпсіздіктің кепілі болып саналады. Б.Момышұлы мұны «Тәртіпке бас иген құл болмайды» деп кесіп айтып кеткен. Қазақ жерінде заң жарғылары ежелден қарастырылған. Сонау түркі заманында тасқа жазылған бітік жазуларына зер салсақ, дамы­ған орта ғасырларда Жүсіп Баласағұн жазған «Құтты білікте» мемлекеттегі ең басты мәселелердің бірі ретін­де заң мен тәртіп айтылады. Мұн­дай көзқарастарды әл-Фараби бабамыздың еңбектерінен де көп кездестіруге болады. Бұл темірдей тәртіп одан кейінгі Алтын Орда, Шағатай ұлы­сы және Моңғол мемлекетін­де де сақталды. Ал Алтын Орданың ізбасары болатын Қазақ хандығындағы Қасым ханның «Қасқа жолы», Есім ханның «Ескі жолы», Тәуке ханның «Жеті жарғысы» – ХХ ғасырдың басындағы заңдар жинағы тәуелсіздік жылдары құрастырылған заңдарымыздың қайнар көзі деуге болады.

Жоғарыда қозғалған мәселе­лерді әрі қарай дамыту халыққа жүктеледі. Өйткені бір жағадан бас, бір жеңнен қол шығарып, жауапкершілікті жұмыла көтергенде ғана Әділетті Қазақ­станды бірге құра аламыз.

 

Анар БАЙМАҒАМБЕТОВА,

Қолжазбалар және сирек кітаптар ұлттық орталығының бөлім басшысы

Соңғы жаңалықтар

Президент Жамбыл облысына барды

Қазақстан • Бүгін, 11:43

Жер дауы заңмен шешіледі

Аймақтар • Бүгін, 08:55

Ұқсас жаңалықтар