– Әсет Жоламанұлы, өзіңіз басқаратын басқарманың есебіне назар аударсақ, 2022 жылғы ІІ тоқсандағы статистикалық мәліметтерге сәйкес облыстағы жұмыссыздықтың деңгейі – 5,1%. Экономиканың әртүрлі салаларында 336 441 адам жұмыспен қамтылған, десек те жұмыссыздардың саны 18 173 адамды құрады. Жалпы, өңірде жұмыссыздықты азайту үшін қандай іс-шаралар жүргізіліп жатыр.
– Биыл 2021-2025 жылдарға арналған Кәсіпкерлікті дамыту жөніндегі ұлттық жоба аясында 12 мыңнан аса адамды жұмыспен қамтудың белсенді шараларына тарту жоспарланып отыр. Ол үшін республикалық бюджеттен – 861,2 млн теңге, Ұлттық қордан – 4,2 млрд теңге, жергілікті бюджеттен 2,8 млрд теңге бөлінді. Биылғы 1 қыркүйектегі жағдай бойынша облыстың жұмыспен қамту орталықтарына 29 537 адам хабарласып, 16 603 адам жұмыспен қамтудың белсенді шараларымен қамтылды. Бағдарлама аясында 314 адам 400 АЕК көлемінде қайтарымсыз грант алып, 629 адам онлайн курстарға қатысып, 90 адам кәсіптік оқытудан өтті. Тұрақты жұмыс орындарына 6 881 адам, субсидияланатын жұмыс орындарына 6 823 адам жұмысқа орналастырылды. Нақтырақ айтсақ, әлеуметтік жұмыс орындарына – 525 адам, жастар тәжірибесіне – 817 адам, қоғамдық жұмыстарға – 5 364 адам, «Алғашқы жұмыс орны» жобасына – 101 адам, «Күміс жас» жобасына 16 адам жолданды. Жалпы, 2022 жылы облыста 20 560 жұмыс орнын құру жоспарланған болатын, оның 11 580-і – тұрақты, 8 980-і – уақытша жұмыс орыны. Есепті кезеңге 18 389 жұмыс орны құрылды. Оның ішінде 11 235-і – тұрақты жұмыс орны. Сонымен қатар облыста Ұлттық жобалар шеңберінде 2 469 тұрақты, 7 455 уақытша – барлығы 9 924 жұмыс орны құрылады. Бүгінге дейін 7 341 жұмыс орны құрылды, оның ішінде тұрақты жұмыс орны 395 болса, уақытша жұмыс орны – 6 946, яғни жоспардың 73,9%-ы орындалды.
– Жұмыссыздықты азайтудың бір бағыты инвестициялық жобалардың үлесі қандай?
– 2022 жылы облыста 27 инвестициялық жоба іске асырылады. Бұл жобалар есебінен 1 390 жұмыс орнын құру жоспарланған. Оның ішінде 1 052-і тұрақты жұмыс орыны. Бұл жобалардың ішінен 24 жоба – өткен жылдардан өтпелі жобалар. Бүгінде бұл инвестициялық жобалар арқылы 576 тұрақты, 254 уақытша – барлығы 778 жұмыс орны құрылды. Осы жылы өңірдегі ірі мұнай өндіруші кәсіпорындарға және олардың мердігер ұйымдарына 1 679 жергілікті тұрғынды жұмысқа орналастыру жоспарланған еді, қазір соның 1 017-сі жұмысқа тұрды.
– Мысалы, қандай орындардан жұмыс тапты?
– Атап айтқанда, «ӨзенМұнайГаз» АҚ-ға – 463, «ӨзенМұнайГаз» АҚ мердігер ұйымдарына – 279, «МаңғыстауМұнайГаз» АҚ-ға – 99, оның мердігерлеріне – 148, «Қаражанбасмұнай» АҚ мердігер ұйымдарына 28 адам жұмысқа орналасты.
Сонымен қатар 2021 жылдан бастап облыста өңірлік «Жұмыс істеймін» жобасы іске қосылды. 2022 жылы жобаға облыстық бюджеттен 955,5 млн теңге қаражат бөлінді. Жыл басынан бері Жаңаөзен қаласы бойынша – 252, Қарақия ауданы – 135 адам барлығы 387 адам жұмысқа жолданып, қазіргі уақытта 746 адам жұмысын жалғастырып жүр. Жұмысшылардың орташа жалақысы 175 мың теңгені құрайды. Сондай-ақ өңірдің жұмыссыз азаматтарын Ресей Федерациясының «Татнефть» компаниясына жұмысқа орналастыру бойынша жұмыстар жүргізілуде. Бүгінде 40 адам жұмысқа орналасты. Аталған бағыттағы жұмыстар жалғасады.
– Жұмыссыздық түбегейлі жойылмайды, бірақ жүйелі және тиімді жүргізілген жұмыстар оны белгілі бір дәрежеде еңсеруге, яғни азайтуға әсерін береді деп ойлаймын. Сондықтан жұмыс көздерін әртараптандыру да басты назардағы мәселе.
Маңғыстау облысы
