Қоғам • 29 Қыркүйек, 2022

Ұстаздарға қызметтік пәтер берілді

51 рет көрсетілді

Кейінгі жылдарда ұстаздардың мерейін тасытып, мәртебесін асыратын игі істер көбейді. Не десек те, білім саласы қызметкерлеріне қошемет көп­тік ет­пейді. Қазан айының алғашқы жексенбісінде өтетін Ұстаздар күні қарсаңында Қара­ған­ды облысында бір топ мұғалімге қызметтік пәтер кілті табысталды.

Мұндай үй 4 педагогке Саран мен Ақтас қаласынан бұйырып отыр. Білім бас­қар­масының меншігінде бұл екі қалада 24 пәтер бар. Ал енді ғана пәтерлі бол­ған­дар арасында жас мамандар­мен бірге сұранысқа ие мұға­лім­дер де бар екенін айтады Қарағанды облыстық білім басқармасының басшысы Гүлсім Қожахметова.

Қызметтік пәтерге қа­тыс­ты өтініштер арнайы тұр­ғын үй комиссиясында қаралды. Барлығы 7 өтініш келіп түскен. Комиссия отырысынан соң 4 өтініш мақұлданып, пәтер иелерімен келісімшарт жасалды.

«Білім-инновация №2» лицейінде тарих пәнінен сабақ беретін Перуза Жайық­баева – қызметтік пә­тер алған мұғалімнің бірі. Оның еңбек өтілі 18 жыл екен. Бұған дейін 15 жылға жуық пәтер жалдап келіпті.

– Мен Қызылорда өңі­рі­нің тумасымын. Қара­ған­дыға 2007 жылы көшіп келдім. Көп жылдан бері балаларыммен үй жалдадым. Оңай емес, әрине. Пәтерді жалға берушілер жиі төлемдерін өсіріп жіберетін. Тіпті кейде ескертпестен тұрып жатқан үйімізді сатып жіберген кездер де болды. Қызметтік пәтер берілгеніне қуаныштымын. Енді тек коммуналдық қыз­меттер ақысын төлеймін. Бұл – мұғалімге үлкен көмек, – дейді Перуза Жайықбаева.

Бүгінде білім басқар­ма­сы­ның меншігіндегі бар­лық қызметтік пәтер ұс­таз­дарға берілгенін атап өткен жөн.

 

Қарағанды облысы

Соңғы жаңалықтар

Аққан жұлдыз ізімен

Таным • Кеше

Сахнаға адалдық

Өнер • Кеше

Ұқсас жаңалықтар