Аталған ұйымның басшысы Нұрбек Қарабаланың айтуынша, күні кеше ғана жартылай финалдық сайыста сынға түсетін төрт мықты спортшы іріктеп алынды. Бұл бәсекелер Жұман Жұмабеков (11-5) пен Елжан Әлиасқар (9-3) және Дастан Аманкелді (3:0) мен Еламан Шертаевтың (6-1) арасында өтеді. Осы сынақтан сүрінбегендері финалда айқасады. Жарыс жеңімпазы 5 миллион теңге көлемінде сыйақы алумен қатар, осы лиганың алтын белбеуі үшін таласады. Дәл қазіргі кезде чемпиондық атақ Оңтүстік Кореяның оғланы Су Ен Юге тиесілі. Өткен аптада ол Алматыда жалауы желбірген жарыста қазақтың ұлы Айдын Көдекті төртінші раундта «қылқындыру» әдісімен жеңген болатын.
