Демократиялық күштердің «Қазақстан - 2050» жалпыұлттық коалициясының Еуразиялық экономикалық одақтың құрылуына байланысты ҮНДЕУІ

ҚҰРМЕТТІ ОТАНДАСТАР! Бүгінде еліміз Ресей және Беларусь мем­лекеттерімен бірлесіп, Еуразиялық эконо­микалық одағын құру қарсаңында тұр. Сонау 1994 жылы Мемлекет басшысы Нұрсұлтан Назарбаев еуразиялық ықпалдастық бірлестігі идеясын ұсынған болатын. Содан бергі аралықта өткен 20 жылдың ішінде Еура­­зия­лық экономикалық қауымдастығы мен Ке­ден одағынан Біртұтас экономикалық кеңіс­тікке дейін эволюциялық жолға ұласқан үш ке­зең өтті. Алдымызда үш елдің ұлттық экономикалары мен қарапайым азаматтарының әл-ауқатын арттыруға бағытталған интеграция мен өзара күш біріктіру бағдарының нәти­же­лілігін айрықша растайтын Еуразиялық эконо­микалық одақ құру туралы шартқа қол қою міндеті күтіп тұр. Күн санап шиеленісе түскен жаһан­дық эко­номикалық бәсекелестік жағ­дайында сыртқы әлеммен өзара тиімді қарым-қатынас орнату, әлемдік, сондай-ақ, аймақтық интеграциялық ұйымдарға қатысу ел дамуына қажетті сер­пін беру­дің аса маңызды шартына айнала бас­тағаны барған сайын айқындала түсуде. Мұны дүниежүзілік тәжірибе де айғақтайды. Мәселен, қатарына енуге Қазақстан талпынып отырған әлемнің ең дамыған 30 мемлекеті әртүрлі сауда-экономикалық ұйымдардың мү­шелері болып табылады. Қазіргі таңда дүние­жүзі бойынша 200-ден астам аймақтық ықпал­дасу жобаларына әлемдік қоғамдастық мүшелерінің барлығы дерлік кіреді. Еуразиялық интеграцияның эко­но­ми­калық тартымдылығына және қатысушы мемлекеттер үшін пайдалылығына осы бірлестікке Қыр­ғызстан, Армения, Тәжікстан, Чили, Израиль, Пә­кістан, Иран, Түркия, Үндістан, Вьетнам сияқ­ты және басқа да елдердің жоғары қызы­ғу­шылық танытуын жарқын мысал деуге болады. Еліміздің Президенті мемлекеттің ұзақ мерзімді дамуының басты бағыттарын ай­қын­дап, Ұлттық іс-қимылдың нақты жобасы – «Қазақстан-2050» Стратегиясын ұсынды. Тәуелсіздік жылдары Елбасы бағ­дарының аясында қазақстандықтардың өмір сапасын айтарлықтай жақсартқан және қоғамның тұрақты дамуына серпін берген кең көлемді саяси және экономикалық реформалар іске асырылды. Өз мемлекеттілігімізді құрудың тарихи міндеті орындалды. Бірлік пен келісім сияқты қоға­мымыздың асыл құндылықтарын нығайту, сондай-ақ, барша қазақ­стан­дықтардың күнделікті еңбегі мен жасампаз күш-қуаты елдігіміздің тұғырланып, өркен жаюын қамтамасыз етті. Халықтың қолдауына иек арта отырып, еліміздің Тұңғыш Президенті Нұрсұлтан Назарбаев ең ірі ядролық қару арсеналынан бас тарту жөнінде тарихи шешім қабылдады. Көп­векторлы салиқалы сыртқы саясатты жүргізе отырып, Қазақстан барлық көршілес елдермен мемлекеттік шекара мәселесін шешіп, әлемнің барша мемлекеттерімен бейбіт әріптестік қа­рым-қатынас орнатты. Қазақстан Тәуелсіздік жылдары бастапқы мүмкіндіктері төмен елден посткеңестік кеңіс­тіктегі экономикалық көлемі жағынан ау­қымды екінші мемлекетке айналды. Атап айтқанда, елге орталықазиялық аймаққа келген барлық шетелдік инвестицияның шамамен 70 пайызына пара-пар 160 млрд. АҚШ доллары тартылды. Халықтың жан басына шаққандағы ішкі жалпы өнім 600-ден 14 мың долларға өсіп, еліміздің алтын-валюта қоры 100 млрд. АҚШ долларына жетті. Осы жылдары екі есеге ұл­ғай­ған ел экономикасы бүгінде Орталық Азия ел­дерінің экономикаларының тұтас көлемінен екі есеге асып отыр. Еуразия жүрегінде орналасқан еліміздің жаңа елордасы – Астана Тәуел­сіздіктің шынайы символына және ұлттық экономиканың локомотивіне айналды. Қазақстан осы тарихи межеге экономикасы серпінді дамыған әрі жетістіктерімен әрбір қа­зақстандық мақтана алатын қалыптасқан, тұ­ғырлы демократиялық мемлекет ретінде жетті. Ресей және Беларусьпен Еріктілік, Теңдік, Прагматизм және Бәтуаластық қағидаларына негізделген экономикалық интеграция жасау ел экономикасының бұдан әрі дамуы үшін айрықша әлеуеттер түзіп, келесідей мүм­кіндіктер есебінен өсім береді: ● жалпы көлемі 170 млн. адамды құрайтын нарыққа шығу; ● Еуразияда жалпы көлемі 2,5 трлн. долларға тең жаңа экономикалық орта­лық құру; ● шетел инвестициялары көлемінің, өзара қаржылай құйылулардың өсуін қам­тамасыз ету, бірлескен кәсіпорындарды кеңейту және олардың жаңасын құру; ● нарықтық бәсекелестіктің артуы­на байланысты іскери белсенділікті айтарлықтай арттыру және отандық тауарлар мен қызметтер үшін үлкен нарыққа қол жеткізу; ● экономиканы әртараптандыру, сала­аралық кооперацияны күшейту, өндірістің жаңа салаларын дамыту; ● жұмыс орындарын ашу, еңбек ре­сурстарының мобильділігін арттыру, жаңа еңбек нарығына қол жеткізу; ● қатысушы елдердің білім, ғылым, медицина қызметтеріне азаматтардың еркін қол жеткізуін оңайлату, сондай-ақ, шекаралық ынтымақтастықты және кең ауқымды мәдени-гуманитарлық байланыстарды интенсивтендіру. Еуразиялық экономикалық одаққа ену алдында ұлттық экономиканы қосымша ынталандыра түсу үшін Мемлекет басшысы отандық кәсіпкерлікке, ең алдымен, шағын және орта бизнеске ерекше қолдау көрсетуде. Бұл «Бизнестің жол картасы», кәсіпкерлерді тексеруге мораторий, Ұлттық қордан 1 триллион теңге инвестиция бөлу, инвестициялық ахуалды жақсартудың жүйелі шаралары, әкімшілік кедергілерді түбегейлі азайту сияқты бірқатар қадамдардан көрініс тауып отыр. Демократиялық күш­тердің «Қазақ­стан-2050» жалпыұлттық коалициясы –  еліміздің ірі үнқатысу алаңы бола отырып, маңызды мемлекеттік бастамалар бойынша қоғамдық мүдделердің үйлесім табуын қамтамасыз ететін бірден-бір құрылым. Біз, саяси партиялар мен жетекші қоғам­дық ұйымдардың өкілдерінен тұра­тын ДКЖК мүшелері Еуразиялық экономикалық одағын құруды толықтай қолдаймыз. Бүгінгідей Отанымыз үшін аса маңызды осы бір тарихи сәтте, біз барша қазақстандықтарды Елбасы саясатының төңірегіне топтасуға, ал Үкімет пен атқарушы органдар жүйесін – ел Президентінің мемлекеттік бағдарын тиімді жүзеге асыруды қамтамасыз етуге шақырамыз. Біз, Еуразиялық экономикалық одақтың ұлттық экономиканың бәсекеге қабілеттілігі мен қарапайым қазақстандықтардың әл-ауқатының артуына айрықша серпін беріп, мемлекеттік Тәуелсіздігімізді нығайта түсетініне және Қазақстанның дамыған 30 елдің қатарына енуіне қажетті жағдай жасайтынына кәміл сенеміз. «Нұр Отан» партиясы, Қазақстанның Коммунистік халық партиясы, «Бірлік» пар­тиясы, Қазақстанның Патриоттар пар­тиясы, «Ақ жол» демократиялық пар­тия­сы, Қазақстанның «Ауыл» әлеумет­тік-демократиялық партиясы, Кәсіп­керлердің Ұлттық палатасы, «Қазақ­стан­ның азаматтық Альянсы» заңды тұлғалар бірлестігі, Қазақстан Кәсіподақтары федерациясы, «Қазақстан Республикасы Ардагерлер ұйымы» қоғамдық бірлестігі, «Болашақ» стипендиясы түлектерінің ассоциациясы» қоғамдық бірлестігі, Қазақ­станның кәсіпкерлер форумы, мүге­дектердің «ДОС» тәуелсіз өмір орталығы» қоғамдық бірлестігі, «ҚР Қарулы Күштері ардагерлері» қоғамдық бірлестігі, «ҚР Қарулы Күштері ардагерлері» Ауғанстан соғысы ардагерлері ұйымдарының ассоциациясы, Қазақстан іскер әйелдері ассоциациясы, «Қазақстан тұтынушыларының ұлттық лигасы» заңды тұлғалар бірлестігі, «Жасыл» экономика мен G-GLOBAL дамы­ту үшін коалициясы» заңды тұлғалар бір­лестігі, Ұлттық ғылым академиясы, Қазақ­стан Жазушылар одағы, Кәсіпкер-әйел­дер одағы, «Республикалық әйелдер кеңе­сі» қоғамдық бірлестігі, «Қазақстан украин­дарының радасы» қоғамдық бірлестігі.