Бұл туралы Қазақстанның машина жасаушылары форумы аясында Индустрия және инфрақұрылымдық даму министрлігі Индустриялық даму комитеті төрағасының орынбасары Олжас Сапарбеков мәлімдеді.
Автомобиль жасауды дамыту мәселелеріне арналған секциялық отырыс барысында Олжас Сапарбеков салада жүзеге асырылып жатқан жаңа жобалар жайында егжей-тегжей баяндады. Бүгінде кореялық Yongsan компаниясымен Hyundai Accent және Hyundai Tucson модельдеріне арналған автомобиль орындықтарын өндіру бойынша бірлескен жоба пысықталуда. Сонымен қатар «Hyundai Trans Kazakhstan» ЖШС зауытында шығарылатын Hyundai Accent, Hyundai Tucson, Hyundai Santa Fe, Hyundai Elantra модельдеріне мультимедиялық жүйелерді орнату үшін MOTREX компаниясымен жұмыс жүргізілуде. Бұл жобалар шығарылатын модельдердегі қазақстандық қамту үлесін және жұмыс орындарының санын ұлғайтуға мүмкіндік береді.
Машина жасау технологиялық тұрғыдан өнеркәсіптегі ең күрделі салалардың бірі. Машина жасауда бір жұмыс орнын құру өзге байланысты салаларда алты жұмыс орнын ашуға мүмкіндік береді. Саланың маңызды бағыттарының бірі – автомобиль жасау.
«2010 жылдың қорытындысы бойынша автомобиль жасау машина жасаудың барлық саласының ішінде небәрі 5 пайызын құрады. 2021 жылдың қорытындысы бойынша автоөнеркәсіптің үлесі 32,1 пайызға дейін артты. Биылғы бірінші жартыжылдықта бұл көрсеткіш 37,5 пайызға жетті. Нәтижесінде, қысқа мерзім ішінде автоөндірушілер саны артып, үнемі салық түсімдерін қамтамасыз ететін сала қалыптасты», деді О.Сапарбеков.
Ол министрліктің қызметі өңдеу өнеркәсібі салаларын кешенді дамытуға бағытталғанын атап өтті. Кәсіпкерлік кодекс шеңберінде көлік құралдарын өнеркәсіптік құрастыру және көлік құралдарына компоненттерді өнеркәсіптік құрастыру туралы жаңартылған келісімдерді енгізу жоспарланған. Сондай-ақ оқшаулауды бағалаудың балдық жүйесі енгізілді. Осылайша, ұсынылатын преференцияларды тиімді пайдалануға және бөлуге мүмкіндік бар.
