Қаңтар оқиғасынан кейін беті ашылған келеңсіздіктерді еңсеру, алдағы уақытта әділетсіздіктерге жол бермеу, қоғамды жаңарту, биліктің халыққа есепті болуын қамтамасыз ету – Қазақстан халқының басты талабы. Бұл туралы халық өз пікірін ашық айтуда.
Президент сайлауы – демократияны дамытуға, мемлекеттік институттарды нығайтуға, жергілікті өзін-өзі басқаруды күшейтуге, сол арқылы толыққанды халықтық билік органдарын қалыптастыруға бағытталған қадамдардың басында тұр деп түсінемін. Біз халық билігін орнатуды демократиялық жолмен қамтамасыз етуге тиіспіз. Бұл орайда, сайлаушылардың алдағы өтетін сайлаулардың бәріне жауапкершілікпен, сауаттылықпен қарағаны абзал. Өйткені әлемнің қарқынды интеграциялануы, күн сайын күрделене түскен геосаяси жағдайлар, экономикалық үдерістер, ішкі, сыртқы саяси ахуал секілді маңызды факторларды назарға алмау мүмкін емес.
Кеше ғана өткен дәстүрлі және әлемдік діндер лидерлерінің съезінде Израильдің раввині әрбір еврейдің өзінің таңғы дұғасында Жаратушыдан сұрайтын екі мәселесін айтқаны еске түсіп отыр. Оның біріншісі – әр еврей азаматы Израильге жақсылық сұрайды, екіншісі бүгін кездескен адамының жақсы жақтарын көрсетуді сұрайды. Қазір біздің еліміз үшін, жалғыз Отанымыз – Қазақстан үшін осындай тілектерді тілейтін, ниетті түзейтін, жаңаруға үлес қосатын уақыт деп санаймын. Мен Қазақстанның жаңару идеясына сенемін.
Президент сайлауы елімізде сайлау парадигмасын жақсартуды, оның ашықтығы мен сайлау үдерісіне халықтың сенімін қамтамасыз етуге тиіс деп ойлаймын. Бұл сайлауда сайлаушылар ой-пікірін ашық айтады, өз таңдауларын жасауына ешкім тосқауыл қоя алмайды. Сайлау барысындағы саяси платформалардың бәсекелестігі азаматтардың саналы таңдауына алып келеді, сайлау әділетті өтеді деп сенемін. Президент сайлауының транспарентті өтуі еліміздің халықаралық қауымдастықтағы беделін арттырып қана қоймай, ішкі саяси тұрақтылықты нығайтуға және экономикамыздың одан әрі қарыштап дамуына жол ашпақ.
Халықтың басым бөлігі ең алдымен әлеуметтік-экономикалық мәселеден өзгеріс күтеді. Мәселен, жақсы өмір сүру, бақуатты тұрмыс кешу, бағаның, газ бен жанар-жағармайдың арзандауы, инфляцияның төмендеуі, жалақының өсуі деген секілді. Тұрмысы түзелсе, соған ырза болып, тіршілік дөңгелегін сүйретіп жүрген қарапайым халық бар. Бұл сайлаудың әділетті болуы, ерікті сайлау институтының орнауы, жаңа саяси қоғамдық бірлестіктердің аренаға шығуы, сол арқылы Парламенттің жасақталуы, міне, шын өзгеріске нақты жасалған қадамдар осылар.
Конституциялық реформалардың түпкі мақсаты – халықтың әл-ауқатын арттыру, әлеуметтік теңсіздікті жою, елдің тұрақтылығын қамтамасыз етуге бағытталғанын ескерсек, бұл сайлаудан кейін еліміз дамудың даңғыл жолына түсіп, уәде етілген, жоспарланған шаруалар кезең-кезеңімен нәтижелі жүзеге асады деген сенім мол.
Ләззат СҮЛЕЙМЕН,
Сенат депутаты