«Ауылдағы нысандарға түгендеу жүргізіліп, нәтижесінде 200-ден астам елді мекенде медициналық пункт жоқ, 400-ге жуық ауылда медициналық мекемелер жалға алынған немесе апатты, бейімделген ғимараттарда орналасқан», деді Ажар Ғиният Үкімет сағатында.
Айтуынша, ауылдардағы медициналық инфрақұрылымдардың жартысынан көбінің тозығы жеткен. Сондай-ақ ауылдарда маман ташылығы көрініс табуда – 1,7 мыңнан астам медицина қызметкері, оның ішінде 1 мыңнан астам дәрігер, 734 медбике жетіспейді.
Ауыл тұрғындары арасында тыныс алу органдары аурулары жиі кездеседі. Ол – 42,7% құраса, бұл 100 000 тұрғынға шаққанда 17164,4 адам деп көрсетті.
Қазақстандағы ауылдық денсаулық сақтаудың тағы да басқа проблемалары – бақылау динамикасының сапасының төмендігі, консультациялық-диагностикалық қызметтердің төмен қолжетімділігі.
«Сонымен қатар созылмалы дертке шалдыққан науқастарды қымбат дәрі-дәрмекпен қамтамасыз ету – қала тұрғындарына қарағанда ауыл тұрғындары арасында екі есе аз. Бірқатар ауылда дәріхана жоқ», деді Денсаулық сақтау министрі.
Жансая ӘНУАР
