Ресми ұйымдар аталған тарифті қолданысқа енгізу арқылы жолаушылардың нақты легін бақылауға, қажет жағдайда қосымша автобустар шығаруға мүмкіндік берілетінін атап отыр. Бюджеттен бөлінетін субсидия да осыдан соң қайта қаралмақ.
– Сараланған тарифті енгізу туралы шешім Әділет министрлігімен келісілді. Тиісті қаулыға «Автомобиль көлігі туралы» заңға сәйкес қол қойылды. Ақпараттық құқықтық жүйелерде жарияланды, – деді Қарағанды қаласы коммуналдық шаруашылық, жолаушылар көлігі және автомобиль жолдары бөлімінің басшысы Әлібек Дүйсембеков.
Сонымен қатар ол Қарағанды қаласының ішіндегі № 118, 145 экспресс-бағыттардағы қосымша ақы төлеу жойылатынын хабарлады. Жолақыны қолма-қол төлеген жолаушыларға ерекше үлгідегі қағаз билет беріледі.
Бүгінгі таңда Қарағанды қаласындағы қоғамдық көлікте карта төлемінің үлес салмағы 60%-ға жеткен. Жария етілген деректер күн сайын «onay» картасымен шамамен 150 мың төлем жасалатынын мәлімдейді. Мамандар сараланған тариф іске қосылғанда картамен төлеу 95%-ға дейін артатынын болжайды. Осы күні қоғамдық көліктің бәрінде картамен төлейтін құрал орнатылған.
– Барлық автобуста «onay» электронды жолақы төлеу құралы орнатылған. Қала тұрғындарына ыңғайлы болу үшін бізде қызмет көрсету орталығы жұмыс істейді. Қаланың әр ауданында азаматтарды тіркеу орталықтары ашық. Бірыңғай көлік картасын қалада 70-тен астам жерден сатып алуға болады, – дейді «Алматы қаласының көлік холдингі» ЖШС Қарағанды облысы бойынша филиалының директоры Георгий Когай. Бүгінгі таңда жолақыны төлеудің әртүрлі тәсілдері қолданылады. Ол – карта, QR-код, көлік коды, SMS арқылы. Сондай-ақ қолма-қол ақшамен төлеуге рұқсат.
Автопарктер қоғамдық көлік тасымалына тағы 92 жаңа автобус сатып алуды жоспарлап отыр. Бұйырса, тағы жаңа 40 көлік жолаушылар тасымалына шығады. Былтырғы желтоқсаннан бастап, қолданысқа енген «onay» электронды төлем жүйесінің картасын 195 мың қарағандылық алды. Оның 111 мыңға жуығы жеңілдетілген санаттағы тұрғындар болса, Бірыңғай картаны 80 мың азамат сатып алған екен.
Қалааралық маршруттарда тарифтер өзгеріссіз. Онда жолақысын тек қолма-қол төлеу керек.
ҚАРАҒАНДЫ
