Қазақстан – форум төрағасы

Қазақстан Республикасы орнықты даму жөніндегі Азия-Тынық мұхиты форумының төрағасы болып тағайындалды. Бұл шешім 2014 жылдың 19-21 мамыр күндері Паттайя (Таиланд) қаласында өткен форумның 5-ші сессия барысында қабылданды, деп хабарлады ҚР СІМ-інің баспасөз қызметі. Басты мақсаттарының бірі эконо­микалық, әлеуметтік, қаржы және қорша­ған ортаны қорғау салаларын дамыту мәсе­лелеріне қатысуға әлем елдерін ынта­ландыру болып табылатын форум жұмысына өңір елдері, қызығушылық танытқан даму институттары, ғылыми және қаржылық, сондай-ақ, индустрия және бизнес ұйымдарының өкілдері қатысты. Форумға Қазақстан Республикасының Қоршаған орта және су ресурстары вице-министрі Бектас Мұхамеджанов қатысты. Ол планетарлық шектік көрсеткіштер шеңберіндегі бірлесіп даму мәселелері жөніндегі сессия мен министрлердің «дөңгелек үстел» отырысын өткізді. Аталған форумды БҰҰ Азия және Ты­нық мұхит мемлекеттері үшін эконо­микалық және әлеуметтік комиссиясы даму мәселелері бойынша аймақтық үнқа­тысуды қолдау мақсатында ұйым­дастырады. Шара барысында Азия-Тынық мұ­хи­ты механизмінің, сондай-ақ, осы аймақ­тың дамуы жөніндегі БҰҰ кеңесінің іс-әрекеттерінің нәтижелері қарастырылды. Сонымен қатар, жоғары деңгейде өтетін дүниежүзілік саяси форумда 2015 жылдан кейінгі мерзімге арналған мыңжылдық даму мақсаттары аясында талқыланатын мәселелер пысықталды.