Балықтар қырылды ма, жоқ па?

19 мамырда «Ақтаудан 214 шақы­рым қашықтықтағы Қаражанбас аумағында Каспий теңізінің жағала­­­уында балықтар қырылып жатыр» деген хабар тарады. Дерек көздеріне сүйенсек, өлі балықтардың су бетінде қалқып жатқаны жайлы хабарды «Эко Маңғыстау» үкіметтік емес мекемесіне жергілікті тұрғын жеткізген. «Хабар жергілікті тұрғыннан келіп түсті. Ол демалыс күндері теңізде жүздеген өлі балықтың су түбінде де, су бетінде де қалқып жүргенін айтты. Осыдан кейін табиғатты қорғау прокуратурасына қажетті шара қолдану үшін сұрату жібердік», – деген болатын бұл туралы «Эко Маңғыстау» үкіметтік емес мекемесінің жетекшісі Кирилл Осин. Алайда, бұл ақпарды Маң­ғыстау ­облысы бойынша балық инс­пекциясының бас маманы Жасұлан Бектұрғанов жоққа шығарды. Ақ­пар шыққан күннен бастап  арнайы ихтиолог, зертхана қызметкері, мем­лекеттік инспектор және аталмыш инспекцияның бас маманынан құрыл­ған комиссия зерттеу жүргізген. – Біз сол күні кешке таман оқиға орнына келіп жеттік. Бірақ, жағалау таза болды. Келесі күні таңертеңгі 7.30-дар шамасында тағы келдік. 215 шақырымдық жағалауда қамыстар мен шайынды сулар кездесті. Осы жерлерден барлығы 8 сазан өлексесін таптық. Олар қатты соққан желдің әсерімен қамыстарға дейін жеткен толқындармен бірге келіп, су кері қайтқанда қалып қойған деген ойдамыз, дейді Ж.Бектұрғанов. Ал зертханалық талдаулар мен эксперттік қорытындылар теңіз суына жүргізілген химиялық зерттеу нәтижесінде су құрамында мұнай өнімдерінің тіркелмегендігін, судың қалыпты жағдайы сақталғандығын алға тартады. Бас маман Ж.Бектұрғанов жаға­лаудағы қамыстарды аралап шық­қандығын, бірақ суреттерде бейнеленген ірі қамыстар мен суларды кездестірмегендігін айтады. Сурет авторының оны қайдан түсіргендігін түсіне алмаған ол автордың алдымен инспекцияға немесе сол аймақтың пайдаланушылары мен инспекторына неге хабарласпағандығына таңданыс білдірді. Сонымен, «домбырам не дейді, мен не деймін?». Гүлайым ШЫНТЕМІРҚЫЗЫ, «Егемен Қазақстан». Маңғыстау облысы.