Ойлы оқырманға жол тартқан жаңа жинақтарда шығыстанушының тарихи деректерді түпнұсқадан пайдаланып, араб жылнамашыларының шежірелік жазбалары мен батыс ориенталистерінің тұжырымдарынан мол мәлімет келтірген. Әсіресе бала күнінде қыпшақ даласынан тұтқынға алынып, жат жерде ерен ерлігімен құлдықтан қайраткерлікке көтерілген Байбарыс сұлтанның тағдыры мен батырлығы, қайсарлығы, ақылдылығы, мырзалығы басынан кешкен қызықты оқиғалармен шебер жазылған. Әлемнің жеті кереметінің бірі пирамидалар үстінде мәмлүктердің киізүй тіккені жөніндегі тың мәліметке де қанығасыз. Сондай-ақ «Ер қаруы – бес қару» атты тіркестің астарында бабаларымыздың жеке қару түрін қалай қолданғанын мәмлүктердің әскери трактаттары мен қазақ ауыз әдебиеті үлгілерінде сақталған материалдар негізінде баяндайды.
Жиында белгілі ғалым, қаламгер, Парламент Мәжілісінің депутаты Сауытбек Абдрахманов автордың ізденімпаздығы мен байбарыстанудағы еңбегіне зор баға беріп: «Бұл жағынан келгенде сіздің алдыңызға түсетін маман жоқ. Сіз сұлтанның есімі «Бейбарыс» емес «Байбарыс» екенін ғылыми тұрғыдан дәлелдеп бердіңіз», десе Парламент Мәжілісінің депутаты Дархан Мыңбай зерделі зерттеушінің біреудің жазғанын аударып емес, түпнұсқамен тікелей жұмыс істейтінін атап өтті. Ал қоғам қайраткері Сәрсенбай Еңсегенов автордың биыл мамыр айында Атырау жұртшылығымен кездесіп, ол жақтан үлкен әсермен оралғанын тілге тиек етті. Сонымен қатар басқа да зиялы азаматтар арабтанушының іргелі ғылыми еңбектеріне тоқталып, ой-пікірлерін білдірді.
Мазмұнды іс-шара соңында Қайрат Сәки жаңа кітапқа енген дүниелері туралы сөз қозғап, алдағы жылы сұлтан Байбарыстың туғанына 800 жыл толатынын айтып, жиналған қауымның парасатты пікірі мен жылы лебізіне ризашылығын жеткізді.
