Қала мен аудандарда бірқатар әлеуметтік құрылыс нысандары ашылады. Балалар жылы аясында демеушілер қолдауымен салынып жатқан 80 ойын алаңының 67-сі пайдалануға беріледі. Сонымен қатар қалалық автобус паркі жаңа көліктермен толықтырылады. Жалпы 17-30 қазан аралығында жоспарланған мерекелік іс-шаралар халықтық сипатта өтеді.
Мереке қарсаңында Жаңақорған ауданында жаңа демалыс паркі ел игілігіне берілді. Облыс әкімі Нұрлыбек Нәлібаев мәдени нысанды аралап, тұрғындар қуанышына ортақтасты. Облыс басшысы аудан халқымен кездесуде ұлттық мереке аясында өңірде жүзеге асатын жаңа бастамалар туралы айтты.
– Туған жеріне тілеулес, ортақ іске жанашыр кәсіпкер азаматтардың қолдауымен аймағымызда жаңа нысандар бой көтеріп келеді. Бүгін тұрғындар серуен құрып, ой сергітіп, бой жазуына мүмкіндік беретін жаңа демалыс паркі пайдаланылуға берілді.
Мұнан бөлек, Балалар жылына сый ретінде қала, аудандарда 80 ойын алаңы салынып, басым бөлігі қолданысқа беріліп жатыр. Соның ішінде Жаңақорған ауданында 10 шағын спорт алаңқайы қазан айының соңына қарай ашылады, деді аймақ басшысы.
Өзге аудан орталықтарында кездесе бермейтін парк белгілі кәсіпкер Марлен Ысқақов жетекшілік ететін «Азимут-М» жауапкершілігі шектеулі серіктестігінің қаржысы есебінен салынды. Жалпы, құны 790 млн теңге болатын паркте тұрғындардың кешкі уақытта таза ауамен тыныстап, сауық құрып, серуендеуіне бар жағдай жасалған. Түрлі аттракциондар, субұрқақ, жазғы сахна, балалардың ойын алаңдары аудан тұрғындарға қызмет көрсетеді.
Алдағы уақытта парк ішінен балаларға арналған кафе және неке сарайы салынбақ.
Демалыс паркі алаңында облыс әкімі халықпен кездесу өткізді. Басқосу барысында Нұрлыбек Нәлібаев аудан жұртын алаңдатып келген мәселелер рет-ретімен шешімін тапқанын тілге тиек етіп, ауыл тұрғындарының сұрақтарына жауап берді.
– Мемлекет басшысының қолдауымен өңірде ауқымды жобаларды қолға алдық. Аз уақыттың ішінде түрлі деңгейде инвестиция тартып, қомақты жобаларға республикадан қаржы әкеліп, көкейлеріңізде жүрген көп мәселені шешуге жол таптық.
Қазіргі таңда Жаңақорған ауданындағы облыстық, аудандық маңызы бар жолдар мәселесі шешімін тапты деуге болады. Бұл мақсатқа 180 млн теңге қаражат бөлінді. Енді тек ауылішілік жолдар мәселесі ғана қалып тұр. Оны да рет-ретімен жасаймыз. Ал білім саласындағы «Жайлы мектеп» ұлттық жобасы шеңберінде 19,5 млрд теңгеге жаңа мектептер саламыз. Заманауи үлгідегі 600 және 300 орындық 2 мектеп осы Жаңақорғаннан бой көтереді, – деді облыс әкімі.
Байкенже ауылы тұрғындарының тілегіне орай жаңа білім ошағын тұрғызуға облыстық бюджеттен 100 млн теңге бөлініп, құрылысы келесі жылы басталады.
Облыс елді мекендерін газдандыру аясында биыл аудандағы Бірлік пен Қыраш ауылдары «көгілдір отынға» қосылады, оған 800 млн теңгеге жуық қаражат бөлінді. Келесі жылы тағы 5 елді мекенді қосу жоспарда тұр.
Қызылорда