Департамент бастығының атынан барлығы 73 анаға «Үздік офицердің анасы» медалі тағайындалса, 10 полицейдің анасына генерал Қайрат Дәлбеков марапатты өз қолымен тапсырды. Осындай марапатқа ие болғандардың бірі – №4 балалар үйінің директоры Нұрсәуле Тастыбаева. Оның қамқорлығындағы 3 тәрбиеленуші – ІІМ Қарағанды жоғары мектебінің курсанты.
Сондай-ақ полиция лейтенанты Ақжан Алтынбек, полиция аға лейтенанты Ерлан Жанысбаев, полиция капитандары Батыйхан Пернебай мен Еламан Абдуалиев есімді батыр полицейлердің, әлемдік полиция ойындарының бірнеше дүркін чемпиондары полиция майоры Ғалымжан Катбаев пен полиция капитаны Дамир Ташанов сынды спортшы-полицейлердің аналарына арнайы медаль табысталды.
«Араға 13 жыл уақыт салып сіздермен бірге Республика күнін атап өту бақыты бұйырыпты. Осы сәтті пайдалана отырып, Шымкент қаласы Полиция департаментінің қалыптасып, дамуына зор үлес қосқан аңыз адам, милиция генерал-майоры Құлахмет Қалменовтің еңбегі жайында айта кеткен жөн. Ол ең қиын шақтарда оңтүстіктегі полиция саласына 12 жыл табандылықпен басшылық етті. Қазіргі таңда қатарымызда аталған нар тұлғаның ізімен келе жатқан қырағы сақшыларымыз жетерлік. Біз олармен әрқашан мақтанамыз. Сонымен қатар біздің жұмысымыздағы әрбір жетістіктің артында департаменттің жеке құрам қызметкерлерінің үлкен еңбегі жатқанын атап өткім келеді. Баршаңызға жанқиярлық еңбектеріңіз үшін алғыс айта отырып, бақ-береке, денсаулық, қажырлы қызметте биік жеңістер тілеймін!», деді департамент бастығы, полиция генерал-майоры Қайрат Дәлбеков.
Сондай-ақ Республика күнінің құрметіне қызметтік міндеттерін адал атқарып, жұмыста жоғары нәтижелерге қол жеткізгені үшін 60-тан аса полиция қызметкері алғысқа бөленді. Ішкі істер министрі Марат Ахметжановтың бұйрығымен полиция департаментінің 15 қызметкері марапатталды. Оның ішінде полиция подполковнигі Максим Сидоровтың шені бір саты жоғарылады.
Айта кету керек, биыл ел Президенті Қасым Жомарт Тоқаев Ұлттық құрылтайдың бірінші отырысында Республика күніне ұлттық мереке мәртебесін қайтаруды ұсынған еді. Осыған орай елдігіміз бен егемендігімізді білдіретін айтулы күн Парламентте бекітілді.
Мерекелік іс-шара соңында эстрада әншілерінің қатысуымен думанды концерт ұйымдастырылды.
ШЫМКЕНТ
