Константин Харламов жақында телеарнаның бірінші маусымы басталғанын еске салды.
«Біз өте құнды мұрамен жұмыс істеп жатырмыз. Біз өмір сүріп жатқан тарихи кезең біздің алдымызға біршама өзгеше міндеттер қойып отыр. Өйткені Жаңа Қазақстан - мемлекеттің жаңа имиджі», деді Константин Харламов Astana Media Week алаңында.
Телеарна директоры Jibek Joly командасының алдына қойған үш негізгі міндетті атады.
«Бірінші міндет - дауысты күшейту. Бұл ақпараттардың ауқымын кеңейтуді білдіреді. Әлемде орын алып жатқан оқиғалар мұның қажеттілігін анық көрсетті. Мемлекет басшысы Қасым-Жомарт Тоқаев елімізде және бүкіл әлемде бейбітшілікті нығайтуға күш салуда. Гибридті соғыстар дәуірінде дәйекті хабар тарату өте маңызды. Сонымен қатар біздің еліміздің ұстанымы әлемдік қоғамдастыққа көбірек қызығушылық танытуда. Біз өзгеріс жолымен неғұрлым белсенді жүрсек, сондай-ақ айналамыздағы әлем қаншалықты күрделі болса, сұраныс соғұрлым күшті болады. Біз тек Қазақстанның ғана емес, Орталық Азияның да дауысына айнала отырып хабар таратуға дайынбыз. Бұл ретте біз басқа да бұқаралық ақпарат құралдарымен ынтымақтастық перспективаларын қарастыруды жөн санаймыз», деді спикер.
Константин Харламовтың айтуынша, екінші міндет - «әңгімелер сиқыры».
«Ежелгі дәуірден бастап тарих білім мен ақпаратты ұрпақтан ұрпаққа жеткізудің негізгі құралы болды. Бұрын адамдар ең жарқын оқиғалар ағынын білу үшін жарқылдаған оттың айналасына жиналып әңгімелесетін. Бүгінгі таңда біздің телефондарымыздың, басқа гаджеттердің, компьютерлердің, теледидарлардың экрандарының жыпылықтайтын жарығы - көптеген тыңдаушыларды жинап жатыр. Бірақ біз өз тарихымызды және кейіпкерлерімізді білеміз бе? Мәселен, Нәзира - Еуропада үлкен сұранысқа ие қазақстандық ди-джей, ол туралы The New York Times газеті де бірегей музыкалық қозғалыс медиасын жасаушы ретінде мақала шығарған. Математик Тимур Рыспеков ше? Ол өз командасымен бірлесіп үлкен деректерді өңдеуге қабілетті бірегей алгоритм жасаған. Оның алгоритмі жер сілкінісі мен банктік алаяқтықты болжау мақсатында қолданылып келеді. Мұндай кейіпкерлер өте көп. Бірақ біз олар туралы шетелдік БАҚ-тан естиміз», деді ол.
Спикер бөліскен үшінші міндет - әлеуметтік оптимизм. Бұл ретте Константин Харламов жаңа телеарна Қазақстанның ең маңызды бастамаларын зерттеп, баяндауға ниетті екенін жеткізді.
Еске сала кетсек, 1 қыркүйектен бастап елімізде QazaqTV арнасы Jibek Joly атауын алып хабар тарата бастады. Арна көрермендерге қоғамдық-саяси оқиғалар, қоғамды толғандыратын мәселелер, мәдени және спорттық жаңалықтарды ұсынады.
