Жалаулы жарыстар

Велоспорт. Кеше «Сарыарқа» вело­трегінде тректегі жа­рыстардың соңғы күні өтті. Ал бүгін Азия чем­пиона­тын­да тас жолдағы жа­рыстар басталады. Футбол. Демалыс күндері Қазақ­стан чем­пионаты премьер-лигасының 13-туры өтті. Бұл турда Қызылорданың «Қай­сар» командасы маңызды жеңіске жетті. Олар өз алаңында «Астананы» 1:0 есебімен ұтып, екін­ші орынға шықты. Ал үш турдан бері жеңілістің дәмін көрмей кел­ген Алматының «Қайраты» Шым­­­­кентте «Ордабасыдан» ұтыл­ды. Кез­десудің 84-минутында Ми­­хаил Бакаев өз қақпасына гол со­ғып алды. «Атырау» өз алаңында «Ер­тіс­тен» жеңілді. Бұл ойында Константин Дудченко жал­ғыз доп­тың авторы атанды. Қара­ған­дыда «Шахтер» «Таразды» ұтты. Бұл матчта да жалғыз гол соғылды. «Ақтөбе» ойыншылары сырт алаңда Семейдің «Спартагын» 1:0 есе­бімен жеңді. Ал «Жетісу» өз ала­­ңында «Тобылдан» 1:2 есебімен ұтылып қал­ды. Теннис. Қазақстандық теннис­ші Зарина Дияс Страсбургте өтіп жатқан Tennis Internationaux de Strasbourg турнирінің ширек финалына шықты. Бірақ, ол ақтық сын кездесуі үстінде ойыннан бас тартты. Оның себебі бізге әзірге белгісіз. Зарина екінші айналымда 21 жастағы хорват Айли Томляновичті ұтқан болатын. Бұл матч екі сетке созылып, 6:4, 7:6 есебімен Зари­наның пайдасына шешілді. Енді Дияс ширек финалда америкалық Кристина МакХэйлмен кездеседі. Турнирде қазақ теннис­шісі бірінші айналымда әлемнің 22-ракеткасы 28 жасар бельгиялық Кристен Флипкенсті 2 сағат 2 минутқа созылған тартысты кездесуде 6:2, 6:7, 6:3 есебімен ұтқан еді. Бокс. Жақында Астанада Қа­зақстан бокс феде­ра­циясының кубогы жолындағы турнирдің ширек финалдық кездесулерінің жеребесі тартылды. Жеребе бойынша «А» тобын Маңғыстау, Шығыс Қазақстан, Павлодар облыстары мен Алматы қаласы құраса, «В» тобында Астана қаласы, Жамбыл, Ақтөбе, Батыс Қазақстан облыстары ойнайтын болды «С» тобына Оңтүстік Қазақстан, Ақмола, Қостанай мен Қызылорда облыстары түсті. «D» тобында Қара­ғанды, Алматы, Атырау және Сол­түстік Қазақстан облыстары күш сынасады. Осы шарада жартылай финалдық жекпе-жектерде қай топтың командалары кездесетіні де белгілі болды. Сөйтіп, жеребе бойынша «А» және «С», «B» және «D» топтарында бірінші орын алған командалар күш сынасатыны анықталды. Ширек финалда «А» тобы­ның кез­­де­сулері Алматыда, «С» тобының жекпе-жектері Көк­шетауда 1-3 тамыз күндері өтеді. «В» тобының айқастары Ақтө­бе­де, «D» тобының жарыстары Қа­рағандыда 8-10 тамыз күндері жала­уын көтереді. Жар­тылай финал мен финал қа­­­лып­тасқан дәстүр бойынша Астанада 14-15 желтоқсан күндері өтеді. Дастан КЕНЖАЛИН, «Егемен Қазақстан».