Ақпарат және қоғамдық даму министрлігінің қолдауымен Қазақстан қоғамдық даму институты ұйымдастырған іс-шараға Орталық сайлау комиссиясы төрағасының орынбасары Константин Петров, жергілікті мемлекеттік органдардың өкілдері, саясаттанушылар, белсенді жастар мен ҚҚДИ сарапшылары қатысты.
Отырысқа қатысқандар ел өміріндегі маңызды науқанның саяси маңызын талдап, алда келе жатқан сайлау барысында ашықтық пен заңдылықты қамтамасыз ету жолдарын қарастырды. Ондағы инновациялар мен өзгерістерді талқылады.
Орталық сайлау комиссиясы төрағасының орынбасары Константин Петровтың айтуынша, кезектен тыс президент сайлауына 12 үміткер ұсынылған. Қазір сайлауалды үгіт-насихат кезеңі басталды. Жалпы, кезектен тыс сайлауды өткізудің кезекті сайлаудан айырмашылығы аз. Яғни екі жағдайда да сайлауға дайындалу және оны өткізу үдерістері бір ережеге негізделеді. Тек үміткерлерді ұсыну, оларды тіркеу мерзімінде ғана аздаған айырмашылық бар.
– Көпшілік арасында үміткерлерді тек саяси партиялар ғана ұсына алады деген жаңсақ түсінік бар. Тіпті кейбір бұқаралық ақпарат құралдарының өзі кейде осындай қателікке жол беріп жатады. Шынтуайтына келгенде, президент сайлауына республикалық қоғамдық бірлестіктер де өз кандидаттарын ұсына алады. Біз мұны іс жүзінде көріп отырмыз. Мысалы, қазіргі Мемлекет басшысының кандидатурасын үш партиядан бөлек, тағы бірнеше қоғамдық бірлестік ұсынып отыр. Айта кететін тағы бір мәселе, 19 қараша тыныштық күні деп белгіленді. Яғни бұл күні үгіт-насихат жұмыстарының бәрі тоқтатылады. Бұрын жарияланған материалдар сайттарда сол күйі тұра береді, бірақ үгіт-насихат мазмұндас контент тыныштық күні бас бетке шығып кетпеуі керек, – деді К.Петров.
Жиында облыс әкімі аппаратының басшысы Мұрат Сандыбаев сайлауды ұйымдастыру және оны материалдық-техникалық жағынан қамтамасыз ету барысында атқарылған жұмыстарды баян етті. Ал жұмыспен қамтуды үйлестіру және әлеуметтік бағдарламалар басқармасы басшысының орынбасары Әлия Мекебаева сайлау учаскелерінің мүмкіндігі шектеулі сайлаушылармен қалай жұмыс істейтіні туралы есеп берді.
Сарапшылар отырысынан кейін Орталық сайлау комиссиясы төрағасының орынбасары жергілікті сайлау учаскелерін аралап, комиссия өкілдеріне арналған семинар-тренингтің барысымен танысты.
Қостанай облысы
