Өтемақы төлеудің шарттарын, тәртібі мен мерзімін әр банк өз бетінше анықтайды. Сондықтан бұл ақпараттарды білу үшін салымшылар депозит ашылған банкке тікелей хабарласуы қажет. Тиісті ақпарат екінші деңгейлі банктердің ресми сайттарында да бар.
«Біз салымшыларды өтемақы алу мүмкіндігін пайдалануға шақырамыз. Егер сізде 2022 жылдың 23 ақпанына дейін депозит ашылған болса, сіздің бұл сыйлықақыны алуға құқығыңыз бар. Өтемақы салымының ең жоғары сомасы 20 млн теңге болғанымен, статистика көрсеткендей, өтемақы төлеуге негізінен 1 млн теңгеге дейінгі депозиттер жатады», деді Қазақстанның депозиттерге кепілдік беру қорының төрағасы Әділ Өтембаев.
Төлемдерді банктер 2023 жылдың 23 ақпанынан кейін ережелерде белгіленген мерзімдерде жүргізеді. Жинақ, мерзімді, мерзімсіз, сондай-ақ білім беру жинақтау салымдары және тұрғын үй құрылыс жинақтары жүйесіндегі жинақтар мен салымдар өтеуге жатады.
Қазақстанның депозиттерге кепілдік беру қорының ақпаратына сәйкес 2022 жылдың 1 қыркүйегіндегі жағдай бойынша 5 млн-нан астам салымшының салымдары өтемақыға жатады. Олардың ішінде салымшылардың 97 пайызында 5 млн теңгеге дейін депозит болса, соның басым бөлігінде (86 пайызы) 1 млн теңгеге дейін салым бар екен.
