Интеграциялық үдерістер үдемелі дамуда

Президент жанындағы Орталық ком­муникациялар қызметінде өткен дәстүрлі брифингке Қостанай облысы әкімінің орынбасары Мұрат Дәрібаев келіп, аймақтағы интеграция үдерістері жайында айтып берді. «Өткен жылы облыстың сыртқы сауда айналымының көлемі 3,7 миллиард долларды құрады. Республика көлемінде аймақтың инвестициялар үлесі 2,8 пайызды құраса, бұл ретте сыртқы сауда балансының сальдосы оң нәтижеге ие. Экспорт импорттан 1,6 есе асып отыр», деді Қостанай облысы әкімінің орынбасары М.Дәрібаев. 2013 жылы Кеден одағы елдерімен сыртқы сауда айналымы 1,6 миллиард АҚШ долларын құрап, ел өңірлері арасында облыс алтыншы орынды иеленген. Облыс айналымында Кеден одағы елдерінің үлесі 42 пайыз болған. Аймақтың КО елдерімен тауар айналымы құрылымында экспорттық жеткізулер 63 пайызды алса, импорттық операциялар – 37 пайыз. Кеден одағы елдеріне экс­порттың негізгі бап­тары темір кені өнімі мен бидай болып та­бы­­лады. Жабдықтар, көлік құрал­дары, шиналар, тұрмыстық техникалар, дәрі-дәрмектер, жи­­­һаздар мен халық тұтынатын өзге де тауарлар импортталады. КО елдері шегінде былтыр об­­­лыстың Ресей Федерациясымен сыртқы сау­да айналымы 1,5 миллиард АҚШ долларын құраған. 2013 жылы «Еураз­Каспиан­Сталь» ЖШС Қос­­танай қаласында ұсақ сортты құ­рылыс бұ­йым­дарын шығару зауыты Ресей инвестиция­сын тарту есебінен іске қосылған. «Агромаш Хол­динг» «ESSIL КЗС-760» астық және «КСК-600-03» жемшөп жинайтын комбайн­да­ры ауылшаруашылық техникаларын құрас­ты­­ру бойынша «Гомсельмаш» беларустік кә­­сіп­орнымен бірлесіп шы­ғару жөніндегі мә­се­лелерді қарас­ты­руда. Қазіргі таңда БК құ­ру бойынша ресми құжаттарды ресім­деу жүр­гізілуде. Сондай-ақ, жаб­дық­тар жеткізу туралы келіс­сөз­дер жүргізу де назарда тұр. Әбдірахман ҚЫДЫРБЕК, «Егемен Қазақстан».