Қазақстан елшісі

Ресей жаратылыстану ғылымдары академиясының шетелдік академигі

Қазақстан Республикасының Ресей Федерациясындағы елшісі Марат Тәжин Ресей жаратылыстану ғылымдары академиясының (РАЕН) құрметті шетелдік академигі атағына ие болды. Диплом тапсыру рәсімі кеше Мәскеуде Ресей Федерациясы Президентінің жанындағы Ресей халық шаруашылығы және мемлекеттік қызмет академиясының ғимаратында болып өтті. РАЕН академиясы президентінің бірінші орынбасары Лидия Иваницкая марапаттау рәсімі барысында Қазақстан-Ресей ынтымақтастығының жоғары деңгейін атап өтіп, осы үдерісте ғылымның ерекше орын алатынына назар аударды. Оның пікірінше, М.Тәжинге берілген шетелдік академик атағы елшінің екі ел ғалымдар қауымдастықтары арасындағы байланыстарды нығайтуға қосқан елеулі үлесінің, сондай-ақ, доктор және академик ретінде социология ғылымын дамытуға сіңірген зор еңбегінің белгісі. «Бүгінгі оқиға, біріншіден, мемлекеттер басшылары Нұр­сұлтан Әбішұлы Назарбаев және Владимир Влади­мирович Путин белгілеп берген Қазақстан-Ресей байла­ныс­тарының кең ауқымын көрсетеді. Мен осында, еура­зия­лық ықпалдастықтың дамуына арналған Қазақстан Президентінің М.В.Ломоносов атындағы Мәскеу мемлекеттік университетінде жақында оқыған дәрісі барысында айтқа­нындай, ғалымдар қауымдастығы мен Ресей қоғамы Еуразиялық экономикалық одақ идеясын қолдайтынын көріп отырмын», деді өзінің сөзінде М.Тәжин.