Коллажды жасаған Зәуреш СМАҒҰЛ, «EQ»
Бірлескен бағдарлама 35 жасқа дейінгі жастарға арналып отыр. Мақсат – жастардың барынша тиімді шарттармен баспана сатып алуына жол ашу. Бұл бағдарламаға дәрігерлер, мұғалімдер, мәдениет және спорт саласының өкілдері, жоғары оқу орындарының профессорлары, ғылыми-зерттеу институттарының ғылыми қызметкерлері, журналистер, әлеуметтік сала мен коммуналдық кәсіпорында жұмыс істейтіндер, сондай-ақ жетім балалар санатымен тұрғын үй кезегінде тұрған азаматтар қатыса алады. Бағдарламаны іске асыру жөніндегі екіжақты келісімге Атырау қаласының әкімі Мейірім Қалауи мен «Отбасы банк» АҚ Атырау облыстық филиалының директоры Нұрбол Құрман қол қойды.
– Біздің банктің басты ұстанымы – қазақстандықтарды жайлы баспанамен қамтамасыз ету. Жаңадан іске қосылатын «Атырау жастары» бағдарламасы табысы жоғары емес жастардың баспана мәселесін оң шешуге бағытталып отыр. Өйткені жастар да пәтер алу үшін «Отбасы» банктегі шоттарына қаражат жинап жүргенін білеміз. Алайда тұрғын үй сатып алуға барлығының бірдей мүмкіндігі жете бермейді. Ал жаңа бағдарлама іске қосылған соң жастардың бұл арманы жақын арада жүзеге аса бастайды. Бұл жобаға облыс әкімдігі 1 млрд теңге бөлсе, «Отбасы банк» АҚ 600 млн теңге салады, – дейді аталған банктің Атырау облыстық филиалының директоры Нұрбол Құрман.
Оның айтуынша, Атырау облысы – жастарды тұрғын үймен қамтамасыз ету бағдарламасы қолға алынған жетінші өңір. Бұған дейін мұндай жоба Алматы мен Астана қаласында, Қарағанды, Тараз, Қостанай және Алматы облыстарында жүзеге асырылған. Қазір облыс әкімдіктері мен «Отбасы банк» АҚ-ның жастардың несие алуына жұмсаған ортақ бюджетінің көлемі 60 млрд теңгеден асқан. Ал «Атырау жастары» бағдарламасына қатысатын әлеуетті несие алушылардың тізімін жергілікті әкімдік ұсынады. Әкімдік бағдарламаға қатысу үшін өтінішті қабылдау және байқау кезеңін дайындап жатыр.
– Бағдарламаға қатысушылар пулы құрылады. Содан соң қатысушыларға «Отбасы банк» арқылы тұрғын үй заемін алуға жолдама ұсынылады. Үміткерлер өздерінің төлем қабілетін растағаннан кейін жылдық 5 пайызбен займ алады. Мұнда алғашқы жарна 10% ғана болады. Бағдарлама қатысушыларына берілетін несиенің ең көп сомасы – 18 млн теңге. Бұл қаржы Атырау қаласынан үй сатып алушыларға беріледі. Ал облыс аумағынан баспана сатып алу үшін 13 млн теңгеге дейін несие беру көзделіп отыр. Несие мерзімі – 25 жыл, – дейді Н.Құрман.
Аталған банктің облыстық филиалы 2006 жылы ашылған. Онда 34 маман жұмыс істейді. Филиалда 7 кеңес беру орталығы мен 82 кеңесші бар. Биыл депозит ашқан атыраулықтардың саны 85 837-ге жеткен. Олардың депозиттегі қаржысы 70 млрд 799 млн 807 мың теңгені құрайды.
«Атырау жастары» бағдарламасының қатысушыларына қойылатын бірнеше талап бар. Біріншіден, өтінім берген кезде қатысушының жасы 35-тен аспауы керек. Екіншіден, қатысушының Атырау облысында немесе Атырау қаласында кемінде соңғы бір жыл тұрақты тіркеуі және өтініш берген кезде өзімен бірге тұратын отбасы мүшелерінің Атырау облысында тіркеуі болуға тиіс. Үшіншіден, бағдарламаға қатысушының және оның отбасы мүшелерінің соңғы 5 жыл ішінде Қазақстан аумағында сатып алу құқығымен жалға берілетін немесе меншік құқығындағы тұрғын үйінің жоқтығы ескеріледі. Төртіншіден, Атырау қаласында немесе Атырау облысында таңдаған мамандығы бойынша ресми жұмыс өтілі болғаны жөн. Бесіншіден, бағдарламаға ерлі-зайыпты жастардың біреуі ғана қатыса алады.
Атырау облысы
