Ведомство мәліметінше, өрт Төле би көшесі, 24 В ғимаратынан шыққан. Алматы қаласы ТЖД күштері мен құралдары аталған мекенжайға кеше сағат 18:45-те шақырту алған. Олар қатты өртті 11 минутта оқшаулаған.
«Өрт сөндірушілер оқиға орнына 3 минутта келіп жетті. Бес қабатты әкімшілік ғимараттың шатыры отқа оранып жатты. Оттың жапсарлас орналасқан, қызу жұмыс істеп жатқан екі қабатты мейрамхана ғимаратына ұласу қаупі туындады. Ағашпен қапталған бұл ғимараттың от тисе, әп сәтте өртеніп кету ықтималдылығы жоғары еді. Өртті сөндіру барысында 20 тұтынушы мен 15 қызметкер эвакуацияланды. Өртті сөндіру кезінде өртпен күрестің екі учаскесі құрылды, өрт оқпандары қолданылды, 90 метрлік «АҚТП» өрт сөндіру автосатысы көтерілді», делінген хабарламада.
Сағат 19:25-те 50 шаршы метр аумақты қамтыған жалын толығымен жойылған. Оқиға салдарынан зардап шеккендер жоқ.
