Қоғам • 10 Қараша, 2022

Шипажайға тегін жолдама

510 рет
көрсетілді
3 мин
оқу үшін

Биыл 3 мыңға жуық бірінші топтағы мүгедектігі бар азамат пен жеке көмек­шісіне курорттық шипа­жайға тегін жолдама бе­рілді. Олар жол­даманы әлеуметтік қызмет­тер пор­талы арқылы алған.

Шипажайға тегін жолдама

Облыстық жұмыспен қам­туды үйлестіру және әлеуметтік бағ­дарламалар басқармасының басшысы Азамат Мәмбетов мәлі­метінше, әлеуметтік қыз­мет­тер порталында 60-тан аса ши­пажайдың тізімі бар.

– Атырау облысы әкім­ді­гінің қолдауымен бірін­ші топтағы мүгедектер мен ерекше балаларға, олардың жеке көмекшілеріне 14 күнге шипажайға жолдама берілді. Тегін жолдаманың баға­сы 55 АЕК көлемін құрайды. Әлеу­меттік қызметтер порталынан мүгедектігі бар барлық топтағы адамдар өздерінің электронды цифрлық қолтаңбасы арқылы үйден шықпай-ақ жолдама алу мүмкіндігін пайдала­нады. Оларға аудандық жұмыс­пен қамту бөлімдері мен округ әкімдіктеріндегі өзіне-өзі қыз­мет көрсету бұрышының ма­манда­ры көмек береді, – дейді А.Мәмбетов.

Әлеуметтік қызметтер пор­талы арқылы таңдаған шипажайына тегін жолдама алған­дардың қатарында Нау­рызбек Шәкиев те бар. Ол – бірінші топтың мүгедектігі бар азамат.

– Бұрын шипажайға те­гін жолдама тек өзіме ғана бері­летін еді. Ал күтушіге жолдаманы өз қаражатымызға сатып алып келдік. Енді биыл жеке күтушіме де шипажайға жолдама бірге берілді. Бұрын қаражаттан қы­сыл­ған кезде 14 күнге есептелген емнің жартысын ғана алуға мәжбүр болып жүрдік. Биыл облыстық әкімдіктің қолдауымен шипа­жайдағы емдік процедураларды толық алдым, – дейді Н.Шәкиев.

Енді өңірдегі жалғызбасты және зейнеткер жасындағы 100 қария шипажайда тегін ем алады. Егде жастағы адамдарға осындай мүмкіндік беру үшін облыстық жұмыспен қамтуды үйлестіру және әлеуметтік бағдарламалар басқармасы, өңірде жұмыс істейтін компания мен «Атырау шипажайы» АҚ арасында үш­жақты келісімшартқа қол қойыл­ды. Келісімшартқа сәйкесе атал­ған басқарма ем-домды қажет ететін 100 зейнеткердің тізімін ұсынады.

– Егде жастағы қарттарға қамқорлық көрсету мақсатында жалғызілікті және әлеуметтік жағдайы төмен отбасындағы ардагерлерге жергілікті шипа­жай­ға жолдама беруді жөн көрдік. Өйткені қарияларға өзге аймақтарда орналасқан ку­рорттық шипажайларға барып-келу оңай емес. Сол себеп­тен олар шипажайларға барудан бас тартады. Осыны ескеріп, «Атырау шипажайы» мен жер­гілікті компания басшыларына ұсынысымызды білдірдік. Олар бұл ұсынысқа қолдау білдіріп, 100 жолдама үшін қаржы бөлуге шешім қабылдады, – дейді А.Мәмбетов.

Оның айтуынша, қариялар жергілікті шипажайда бал­шық­пен, парафинмен емделіп, минералды ванна, физиотерапия, емдік массаж және галотерапия секілді процедураларды алады. Емделуші қариялар стандартты бөлмеде жатып, төрт мезгіл тамақпен қамтылады.

 

Атырау облысы